هاتوچۆ لەبارەی مامەڵەی ئۆتۆمبێل ئاگاداریی دەداتە هاووڵاتییان و دەڵێت هەندێک کەس بڕیاری وەزارەتی ناوخۆیان لە بەرژەوەندی خۆیان بەکارهێناوە.

هەواڵ:KNNC


بەڕێوەبەرایەتی هاتوچۆی هەولێر ڕاگەیەندراوێکی لەبارەی گرێبەستی ئەلیکترۆنی بڵاوکردەوە و ڕایگەیاند: بڕیاری وەزارەتی ناوخۆ لەوبارەیەوە بۆ دڵنیاییدانبووە لە مافی یاسایی کڕیار و فرۆشیار لەکاتی مامەڵەی کڕین و فرۆشتنی ئۆتۆمبێل کە ئەم ئەرکە بەکەس و لایەنی شارەزاو تایبەت مەند سپێردرا بۆ ئەنجام دانی ئەم گرێبەست، بەڵام کەسانیک هەنگاوەکەیان قۆستەوە بۆ بەرژەوندی ماڵیی و دارایی خۆیان و هەستان بە ئەنجامدانی گرێبەست لەناو کابینە هەندێک جار لەناو ئۆتۆمبێل و تەنانەت لە سەرشەقامەکانیش، کەسانێکیش چاو ساغی و دەڵاڵیان بۆ دەکردن، ئەوەش هەم ناشارستانییە هەم بەکارهێنانی هاووڵاتییە.

بەڕێوەبەرایەتییەکە ئاماژە بەوەکردوە، سەرباری هەموو ئەوانە کەسانێکی ناشارەزا گرێبەستەکانیان ئەنجامدەدا کە زۆرترین هەڵەی لێکەوتوەتەوە و هاووڵاتیی بەهۆیەوە توشی کێشەبووە، ناچاربووە دیسناەوە گرێبەست ئەنجامبدات و تێچووی دارایی و کاتی بڕوات.

هەر بۆیە بۆ دووبارە ڕێکخستنەوەی گرێبەستی ئەلیکترۆنی بڕیاری داوە کە ئەم گرێبەستە لەدوای کاتژمێر 02:00ی دواینیوەڕۆ کارابکرێت بۆ ڕێگەگرتن لە کارە نایاساییەکان.

داواش لە هاووڵاتییان کراوە، کە گرێبەستی ئەلیکترۆنی لە شوێنە تایبەتمەندەکان و لای کەسانی شارەزا ئەنجام بدەن....