دوای بەشداریكردنی (400) ئەندام، كۆنفرانسی نەتەوەیی كورد لە قامیشلۆی رۆژئاوا كۆتایی بەكارەكانی هێنا و لە راگەیەندراوێكشیدا ئاماژەبۆ ئەوەكراوە؛ پێویستە سیستەمی حكومڕانی لە سوریا لامەركەزی بێت.


هەواڵ: (KNNC)

ئەمڕۆ شەممە (2025/4/26) بەئامادەبونی (400) ئەندام و ژمارەیەك لە میوانی لایەنە سیاسییەكانی باكور و باشوری كوردستان، كۆنفرانسی یەكڕیزی و یەكهەڵوێستی كورد لە قامیشلۆی رۆژئاوای كوردستان بەڕێوەچو، لەدوای كۆتایی هاتنی كارەكانی لە راگەیەندراوێكدا ئەنجامی كۆنفراسەكە خرایەڕو كە تیایدا هاتوە؛ پێویستە کورد وەک نەتەوە لە دەستوری نوێی سوریادا جێگیربکرێت و زمانی كوردی بەفەرمی بناسێنرێت.

ئەوەشخراوەتەڕو، پێویستە سیستەمی حكومڕانی لە سوریای نوێدا لامەركەزی دیموكراتی پەیڕەوبكرێت و پێكهاتەی كورد هاوبەش بێت لە ئیدارەدانی سوریادا، پێویستە دیمەشق مافەكانی كورد و نەتەوەكانی دیكە  مسۆگەر بكات.

بەلاغی كۆتایی كۆنفرانسی یەكڕیزی و یەكهەڵوێستی كورد جەختی كردوەتەوە، رۆڵی خانمان بەردەوام دەبێت و لە داهاتوشدا بەرفراوانتر دەبێت، بۆ گفتۆگۆ كردنیش لەگەڵ دیمەشق، كۆنفرانسی نەتەوەیی كورد شاندێك پێك دەهێنێت.