کەی ئێن ئێن ناوەڕۆکی کۆبونەوە هاوپەیمانان و نێچیرڤان بارزانی و بافڵ تاڵەبانی بڵاودەکاتەوە

KNN : Kurdish News Network
10:05 - 30/06/2022
کوردستان

دوای چەندی هۆشداری و داواکاری دواجار هاوپەیمانان قسەکانیان دەکەن بە پرۆژە و دەیخەنە بەردەستی پارتی و یەکێتی، بۆ جێبەجێکردن،

سەرباری داواکاری لە مێژینەی خەڵکی کوردستان و بۆیەکگرتنەوەی هێزەکانی پێشمەرگە چەندین ساڵە هاوپەیمانان و ئەمریکا داوا لە پارتی و یەکێتی دەکەن هێزەکانی پێشمەرگە یەکخەنەوە و بەڵام تا ئێستا ئەو کارەیان نەکردوە، لە نوێترین کۆبوونەوەشدا  هاوپەیمانان  نیگەرانی خۆیان لەو بارەیەوە گەیاندووەتە بەرپرسانی هەرێمی کوردستان و داواى یەکخستنەوەى هێزەکانیان لێ کردوون.

گومانی تێدا نییە گەورەترین کێشە لە ناو کێشەکانی بەردەم  فەرمانڕەوایی کورد لە باشوری کوردستان بە درێژایی ٣٠ ساڵی رابردوو و یەکنەگرتنەوەى هێزەکانی پێشمەرگە و دروستنەکردنی هێزێکى نیشتمانی تۆکمەیە ، بە شێوەیەک ئەو هێزە  لە بری یەکلاکردنەوەی کێشە ناوخۆییەکان و ململانێ شەخسییەکان، ببێتە پاسەوانی سنورەکانی هەرێمی کوردستان و لە هەمان کاتدا جێ شانازی  هاوڵاتیان ئەم هەرێمە.

لەم هەفتەیەشدا جه‌نه‌راڵ جۆن برێنان ‏فه‌رمانده‌ى هێزه‌كانى ‏هاوپه‌يمانان له‌ عيراق و سوريا و شاندێكى باڵاى سه‌ربازيى ياوه‌رى، لەگەڵ  نێچیرڤان بارزانی سەرۆکی هەرێم و بافڵ تاڵەبانی سەرۆکی یەکێتى کۆبوەوە.

بەپێى زانیارییەکانى بەردەستى کەى ئێن ئێن، هاوپەیمانان دواى چەندین داواکارى و فشار بۆیەکخستنەوەى هێزەکانى پێشمەرگە، ئەمجارە پڕۆژەیەکى نوێیان داوەتە هەردوو لایەنى پارتى و یەکێتى بۆ جێبەجێکردنى هەنگاوەکانى یەکخستنەوە.

زانیارییەکانى بەردەستى کەى ئێن ئێن ئەوە ئاشکرا دەکەن، کە بەرپرسانى باڵاى یەکێتى و پارتى لە کۆبوونەوەکەدا، لەبرى گفتوگۆکردنى جدى لەسەریەکخستنەوەى هێزەکان، باسیان لە ئاڵنگارییەکانى بەردەمى ئەو پرسە کردووە و باسیان لە بوونى هێزى شەخسیش بۆ هاوپەیمانان کردووە.

لە ماوەی ساڵانی ڕابردوو جگە لە  داواکارییە بەردەوامەکانی خەڵک و هێزە ناوخۆییەکان بەگشتى و بزوتنەوەى گۆڕان بە تایبەت و فشارەکانی خودی نەوشیروان مستەفا بۆیەکگرتوەی هێزەکای پێشمەرگە، وڵاتانی هاوپەیمانانیش بە گشتی و ئەمریکا بە تایبەت چەندین جار داوای لە پارتی و یەکێتی کردووە  هێزەکانی پێشمەرگە لە چوارچێوەی وەزارەتی پێشمەرگەدایەکخەنەوە، بەڵام تا ئێستا ئەو  لایەنە دەسەڵاتدارانە ئەم داوایەیان جێبەجێ نەکراوە، دەرئەنجامی ئەمەش خەڵکی کوردستان باجی گەورەی داوە.

941 جار خوێندراوەتەوە