سەڵاحەدین بەهادین: هەرێم هەردەمێنێت بەڵام ئەو شەهامەتەی جارانی نامێنێت

KNN : Kurdish News Network
05:59 - 28/05/2022
کوردستان

ئەمینداری گشتی یەکگرتوی ئیسلامی لەبارەی قەوارەی هەرێم و مەترسییەکانی سەری چەند زانیارییەکی خستەڕو و ئاماژەشی بە چەند خاڵێك کرد کە دەکرێت دۆخی هەرێم بەرەو باشتر بەرێت.

 

سەڵاحەدین محەمەد بەهادین، ئەمینداری گشتی یەکگرتوی ئیسلامی لە وەڵامی پرسیارێکی KNN لەبارەی مەترسییەکانی سەر قەوارەی هەرێم و حکومڕانییەوە رایگەیاند: پلاسخارت زۆر لەوە زیاتر دەزانێت و وڵاتانی نێوەدەوڵەتیش ئاگاداری دۆخی هەرێمن.

 

ئاماژەی بەوەشداوە، یەکێك لە مەترسییەکان پشت تێ کردنی کۆمەڵگەی نێودەوڵەتییە لە هەرێم بە نمونەش بڕیارەکەی دادگای باڵای فیدراڵییە کە کێ دەتوانێت رێگەی لێبگرێت و بەغداد زیاتر لە جاران دەستکراوەترە.

 

دەشڵێت: ماڵمان لە شوشەیە، ئەڵێین بە دەستور کێشەکان چارەسەر دەکەین، بەڵام لەوانەیە دەستوریش دژی ئێمە بێت، ئەبوایە زوتر و باشتر خۆمان ئامادە بکردایە.

 

وتیشی: دەسەڵاتدارانی هەرێم لە خەیاڵدا دەژین، وا دەزانن بە قسەی خۆشی چەند خەڵکێك کێشەکان چارەسەر دەکرێن.

 

ئاماژەی بەوەشداوە، ئەم هەرێمە بەپێی دەستور دەمێنێتەوە و وەکو جاران کۆمەڵگەی نێودەوڵەتی پێشوازی لە هەرێم ناکات و پەیوەندییەکان وەکو جاران نامێنن، مەگەر یەکێك بەرژەوەندییەکی هەبێت یان هەرێم لە خشتەبەرێت.

 

راشیگەیاند: پێویستە خۆمان چاک بکەین، چەند رۆژێکی دیکە هەڵبژاردنە، کە کێ هەڵبژێرین و کێ بکەین بە حکومڕان، مەترسی جدییش لەسەر هەرێم هەیە، نازانم لەوانەشە تۆپ و تەیارەشی تێکەوێت.

 

بڕیار نامیق- سلێمانی

500 جار خوێندراوەتەوە