لە عێراق گیان لەدەستدان بە تاى خوێنبەربون بەردەوامە

KNN : Kurdish News Network
11:25 - 21/04/2022
تەندروستی


فەرمانگەی تەندروستی پارێزگای نەجەف گیان لەدەستدانی کەسێکی راگەیاند کە گومان دەکرێت هۆکارەکی تای خوێنبەربون بوبێت.

فەرمانگەی تەندروستی نەجەف راگەیەنراوێکی بڵاوکردەوە و تێیدا هاتوە، کەسێك کە گیانی لەدەستداوە بەهۆی خراپی دۆخی تەندروستییەوە پشکنینی خوێنی بۆ نەکراوە، بەڵام نیشانە کلینیکییەکان وا دەریدەخەن توشی تای خوێنبەربون بوبێت و بەو هۆیەوە گیانی لەدەستدا بێت.

ئەوەش لەکاتێکدایە، رێکخراوی تەندروستی جیهانی رایگەیاندبو بڵاوبونەوەی پەتای خوێنبەربون جێگەی نێگەرانییەوە و پێویستە لە ماوەیەکی کورتدا بەر بە بڵاوبونەوەی زیاتری بگیرێت.

تای خوێنبەربون بە هۆی ڤایرۆسێکەوە لە ئەنجامی بەرکەوتن بە مێشومەگەز یاخود ئاژەڵی هەڵگری ئەو ڤایرۆسە رودەدات، کە مێشومەگەز و قرتێنەرەکان و شەمشەمە کوێرە هەڵگری ئەو ڤایرۆسەن.

تایخوێن بەربون لە کەسێکەوە بۆ کەسێکی دیکە لە رێگەی بەرکەوتن یاخود دەست لێدان لە خوێن و شلەی لەش (ئیفرازات) و لیك و سپێرمەوە دەگوازرێتەوە.

پەتای کۆنگۆ یاخود تای خوێنبەربون، بەهۆی ڤایرۆسێکەوە سەرهەڵدەدات کە زیندەوەرێکی بچوک "گەنە" هەڵیدەگرێت و نەخۆشییەکە لە ڕێگەى ئاژەڵەوە بۆ مرۆڤ دەگوازرێتەوە، بۆ یەکەمجار لە ساڵی 1944 لە جەنگى جیهانی دووەمدا سەریهەڵداوە، رێژەى (40%)ى ئەو کەسانەى توشى دەبن پێى دەمرن.

549 جار خوێندراوەتەوە