زۆر ئاسانە، وتاردان و قسەکردن و وەعزو ئیرشادو بەڵێندان بۆ خەڵکی، ئاسانتر لەوە تەماشاکردنی شاشەکان و خۆنەبانکردنە، خۆی ڕاستیەکەی ئەوەی سەختە قەناعەتپێکردن و ڕازیکردنی خەڵکە بێن بەشداربن لە پڕۆژەی چاکسازیی، ئینجا گۆڕانکاریی ڕیشەیی نەک ڕواڵەتیی ئەوەش بەکاریزما دەکرێت و ئێستا بەرەی ئۆپۆزسیۆن نیەتی، هیچ شتێک لە دونیادا بێ بەرامبەر نییە تەنانەت پەنیری سەر تەڵەی مشکێک، دونیا هاوکێشەی ئەرک و سودو قازانجە، قازانج و سوود واتە فەزیلەت و شکۆی تاک، تەنانەت خۆپیشاندانیش بکەیت بەبێ دەستکەوت ئەو کەڵکەی نابێ و، بێ بەرنامەیی و بێئومێدی سەختی لەدوایە، خۆ پرۆسەکە هەر ئەوە نییە دروشمبازی بکەیت و وێنەی ئەو خەڵکە بڵاوبکەیتەوە لەسەرجادە، ئەو خەڵکە سەرمایەو شکۆو عیززەتن، دەبێ وزەکانیان سەرف نەکرێ بە ئاسانی.

لەکۆمەڵگای کوردیدا ئەوەی هەیە هێشتا بێدەنگیە زۆرەکەیە، ڕوبەری تاریکستانەکە، بێدەنگیە زۆرەکەیە نەک لایتی سەرشەقامەکە، هێشتا دەنگدانەوەی بێدەنگییەکە، گەورەترو سامناکترە لەو دەنگە دەنگ و ژاوەژاوو زاهیرە سەوتیەی سەرشەقام و ناو سۆشیاڵ میدیا، لەکۆمەڵناسی سیاسیدا شتێک هەیە بەناوی زۆرینەی بێدەنگ، الأغلبية الصامتة،کە بۆیەکەمجار سەرۆکی کۆچکردوی ئەمریکی ڕیچارد نیکسۆن بەکاری هێنا بۆ جەنگی ڤێتنام، کتومت کۆمەڵگای کوردی ئێستا لەو دۆخەدایەو هێشتا باوەڕناکەم بتوانن لەو پەراوێزە ئەشکەوتیە دەرچن و بێنەبەر ڕووناکاییەکەو شانیان تۆزاویی بکەن، هێشتا سەرگەرمن بە پۆستی فەیس بووک و شرۆڤەی بازاڕیانەوە کە هەر خزمەتی دەسەڵات دەکات، تحليلات عشوائية.

لە عێراق و کوردستانیش ئەو زۆرینە بێدەنگە هەیەو بەشداری لە هیچ هەڵبژاردن و کردەیەکی دیموکراتی و مەدەنیدا ناکەن و پاڵیانداوەتەوە بە کاریتەی هەیوانەکەی ماڵی خۆیانەوە، لەهەڵبژاردنە فیدراڵییەکانی ئەڵمانیاو زۆرێک لەو وڵاتە ئەوروپی و ڕۆژئاواییانیش یەک لەسەر سێی دەنگدەران بەشداری لە هەڵبژاردن و ناڕەزایەتی و خەباتێکی سەندیکایی ناکەن و هۆکارەکانیش ئەوەیە لە پێش هەموو شتێکەوە متمانەو هیوایان لەدەستداوە بۆ گۆڕانکاریی، بەهۆی بەرنامەی وەهمی و خیتابی پۆپۆلیستی و دروشمی یەکسانی حیزبە ئۆپۆزسیۆن و زاڵەکان لە کاروباری ئابووریدا.