دوجۆر میتۆدو بەرگری کوێرانە دەبینرێت لەم جەنگە تازەیەی ئیسڕائیل فەلەستین، کەبێ بەرامبەرو بەلاش و سایکۆلۆژیەو هیچ جۆرە قازانج و دەستکەوتێکی نەتەوەیی تێدا نیە بۆ کورد، کە بەداخەوە خەسارەتمەندو خەوتوی ڕۆژگارە.

هەردوک، نمایشی ئایدۆلۆژیانەو خۆخاڵیکردنەوەیە، یەکەمیان پشتگیرییە لە گوتاری ئیسڕائیلی و میتۆدەکانی دەوڵەتی تەوراتی عیبریی، زیاتر مێژویی و دیرۆکی و سۆزدارانەیەو ئێستاش گوتارێکی حیزبی و ناسیۆنالیستی شوانکارەو تەقلیدیی کوردیی ڕابەرایەتی هەمان تێز دەکات. ئەگەر لە ڕوی کۆمەڵناسی سیاسیەوە سەیری بکەین گشت ئەو لایەنداری و پشتگیریانە هەژاری و داماوی و برینداریی کورد دەردەخات لەڕوی جەستەیی و سایکۆلۆژیەوە کەوابەستەی ئەو مێژوەیە، بەو مانایەی کورد یان خەوتوە یان بارمتەیە بەدەست کاراکتەرە بەهێزەکانەوە.

ساڵەهای ساڵە دەمانەوێت وەک ئیسڕائیل بین و لاسایی بکەینەوە نابین و ناتوانین، دەمانەوێت قوربانی بدەین بۆ خۆمان وەلێ بۆ خەڵکیتری ئەدەین و دەبینە ئەڤیندارو بەرگریکاری سەخت بۆی، دەخوازین یاخی بین و ئاڵنگاریی بکەین ناتوانین بەهۆی پەرتبونەوە، یان دەمانەوێت تولێرانسی ئاینی بپارێزین و خەبات بکەین بۆ دەستخستنی سۆزی گەلانی ئەرمەن و کریستیان و جو هەر ناتوانین، جڤاک و ڕەگەزو زمان و کەلتورەکانیان دەپارێزین و کەچی بێسودە، هێشتا ناتوانین بەدەنگی بەرز وەک جولەکەیەک هاواربکەین و بجەنگین و بچینە ناو شەڕگە ڕاستەقینەکەوە بۆ سەربەخۆیی، چونکە هۆکارگەلێک هەیە بۆ ئەم پرسە سیاسی سۆسیۆلۆژیە وەک؛

* کورد لەدوای ڕێکەوتنی سایکس پیکۆ و لۆزان، لەسەر گوتاری سازش خۆی ڕاهێناوەو بە دەستکەوت و پۆستە کاتیەکانی دەوڵەتی داگیرکەرو بریکارەکانیان، هیچ جۆرە حەماس و ئینتیماو بەرگریەکی نەماوە.

* هێشتا کورد باوەڕی بە زەردەخەنەو زیهنیەتی ئایدۆلۆژیی دوژمنەکانی هەیە کە لەباوەشی بگرێ و زۆرجاریش خزمەتی دەکات وەک بریکارێکی دڵسۆز.

* کورد لە دروشمی سیاسی و حیزبیدا سەربەخۆخوازە، بەڵام لە جەوهەردا بڕیاری نەداوە سەربەخۆبێت و وەک زیهنیەت و گوتاری نەتەوەیی ئامادەسازیی بۆ بکات و هەمو ئەو پەیوەندی و شادەمارانە، بپچڕێنێت کە خەونی دەوڵەتەکەی قوفڵ دەکات.

* ئێستاش ناتوانین وەک زیلینسکی سەرۆکی ئۆکراین و دەیان وڵات و هەرێمی دیکە ئیسڕائیل بخەینە ناو گوتاری فەرمیەوە چونکە ئۆفەری نەیارەکانمان هێشتا قبوڵەو سازشی بۆ دەکەین و بچوک بچوک وەستاوین بۆ موبارەکەیەکی ئەوان.

دوەم تایپ و گروپ،  پشتگیری دینی و عەقیدەیی ئاینخوازەکانە، ئەمیش خۆخاڵیکردنەوەو ئەدای ئەرکێکی دینیەو جیهادی نەفسی بچوکەو ئەمەش دیسان شوێنکەوتنێکی بێماناو هەرزانە بۆ خەڵک و نەتەوەی تر لەژێر سڵۆگەنی ئاینیانەی، أفضل الجهاد كلمة عَدْلٍ عند سُلْطَانٍ جَائِر.

لەکاتێکدا هەمو سوڵتانەکانی دەوروبەری نیشتیمانی کوردان، بێ جیاوازیی، ستەمکارو توندو دژە کوردن و هەڵاوێردیان نیە بۆ باش و خراپ، تۆ براندە ئێرانیەکەت بەدڵەو من تورکیەکەو ئەویش قاوەکەی شام و نەغمەکەی فەیروزیاتی سەباحی.

کورد هەر خەریکی ئەم پشتگیریی و بەرگریە بێزەنتی و بێمانایە بوە بۆ خەڵک، ڕاست و چەپ دابەش دەبێت بەسەر ئەو بلۆکانەداو خۆشی هەزار برین ئەوەتا بەجەستەیەوە، ئەسڵەن نازانێت کرۆکی کێشەی عەرەب و جوەکان و فەلەستین و ئیسڕائیل چییەو پشتگیریان دەکات و ئاهی بۆ هەڵدەکێشێ و بەجیهادی دەزانێ بەرگری لەو فۆڕمە توندوتیژو هەمەجییە بکات دژی مرۆڤی ئاینجیاواز، وەک ناسیۆنالیزمی شوانکارە سەدەیەکە خەون بە گوتاری ئیسڕائیلیەکان و هێرتزل و بن گۆریۆن و شارۆن و مۆردخایەکانەوە دەبینێ و دواجار هیچمان نەبینی لەو پشتگیری و ڕۆمانسیەتە، یانی تاکەی هیچ دەوڵەتێک نییە پشتی کورد بگرێ بۆ دەوڵەتۆچکەیەکی خۆی، مرۆڤ زۆر جار گومان بە دڵسۆزیی باوکە زایەندیەکەشی دەبات لەحاڵەتی تراژیدیای کوردبوندا.