سبەی شاهید دەبین بەسەر دۆخێکی خراپ و کوشندەو ئازارهێنەوە کە چۆن لە کوردستانیش وەبەرهێنی ساختەی سیتی فرۆش، فەرمانبەرو مرۆڤی کوردیان کردۆتە دیل و قوربانی لە پێناو ماشینەوەی ملیۆنە دۆلارەکانیاندا بە هاوکاری یاسایەکی خراپ و بێکەڵکی مۆڵەتی وەبەرهێنان و ڕێسا نەرمەکاندا. ئەگەر زەمین لەرزەیەکی هێواش نەک توند خوانەخواستە بگاتە گوندو سیتیەکانی هەرێم و باڵەخانەو تەلارە فەیک و ساختەکانی وەبەرهێنی هەڵتۆقیوی کوردیی، وەی لە گوزەران و حاڵمان کە چیمان لێ دێت و چۆن بە ساختەکاری و فێڵ و کوالێتی خراپ تەلارو باڵەخانەکان دروست کراون و پارەیان لەسەر خواردوەو خەڵکیش بەو ئاسانییە یەک یەک دەمرن و دەبنە قوربانیی.

هێشتا زەمین لەرزەو کارەساتی سروشتی نەگەشتۆتە ئەم سیتیانەی کوردستان ، کەچی ساڵانێکە یەکەو خانوو باڵەخانەکان شەقیان بردوەو ئەرزەکەی کەندڕبوەو بۆگەناو زیادی کردوەو ئاوەڕۆ دەرناچێت و ئەوەندە دیوارو دیکۆرەکەی کۆن و ڕزیو بوون دەبێ دەرخستە بۆ نۆژەنکردنەوەیان بکرێت بەهۆی ساختەچێتیی و تەماحکاری زۆری ئەم وەبەرهێن و بەڵێندەرانەوە، کە هەندێکیان بێشەرمانە فرمێسک بۆ زەمین لەرزەکەی تورکیاو سوریا دەڕێژن و باسی کۆمەک و هاوکاری دەکەن بۆیان.

باشە بەڵێندەرو وەبەرهێنی کوردیی، بەپێی کام پێوەری ئەندازیاری و ئینڤێستمێنتی زانستی خەڵات دەکرێن لەلایەن دەزگاکانی حیزب و دەستەی وەبەرهێنانەوە !  بەپێی چ پێوەرێکی زانستی و داهێنانکاری و جوانکاری و هونەری تەلارسازیی مۆدێرن خەڵاتیان دەکەن و بە شکۆداریی و جوانیی و ڕێزەوە پیشانیان ئەدەن و دەیانخەنە ڕەفەی مێژوو، یەک پێوەری زانستی و مەنتیقی و عەقڵانیم پیشان بدەن بۆ ئەو تەکریم و خەڵاتانە، با من دەیان مەرج و پێوەرتان بدەمێ لە چەوتی و شکستەکانیان لەو سیتیانەی خۆیان بۆ سزادان و لێکۆڵینەوە لە کەمتەرخەمیەکانیان، نەک ئیڤێنتی شیرینی خواردن و پێکەنینی ساختەو خەڵاتی وەهمی.

خودای گەورە وڵات و گەلمان پارێزراو بکات لە خەڵکانی بەدڕەفتارو هاوکاری بەدڕەفتارەکان و دەردو بەڵاو کارەساتی سروشتی، هاوخەمین بۆ قوربانیانی ئەو تراژیدیاو کارەساتە سروشتیەی ڕۆژاڤاو باکوری کوردستان.