چاکسازی تەنها دەرفەتی هەرێمە

ئاشکرایە هەر وڵاتێک کە توشی هەر قەیرانێک دەبێت لەهەر سێکتەرێکدا، ڕاستەخۆ دەست دەکات بەپرۆسەی چاکسازی لەو سێکتەرەدا.


وە ترسناکترین قەیران کە توشی ووڵاتێک دەبێت قەیرانی ئابورییە، کە سەردەکێشێت بۆ قەیرانی دارایی.


حکومەتی هەرێمی کوردستان لەبەرئەوەی تەنها پشتی بەئابوری نەوت بەستوە، ساڵانێک ئەم کانزایە بەهۆی بەرزی نرخەکەیەوە بەڕێوەبەرانی حکومەتی هەرێمی بەتەواوەتی بێمنەت کرد لە پەرەپێدانی سێکتەرەکانی تری ئابوری.


ئێستا بەهۆی دابەزینی نرخی نەوتەوە هەمو کایەکانی ژیان بەتەواوەتی بەرەو شڵەژان چوە و گەر بەردەوام بێت دوور نیە بەرەو داڕوخانی یەکجاری بچێت.


جێبەجێکردنی یاسای چاکسازی ئەو پرسەیە کە پێویست بوو چەند ساڵێک لەمەوبەر دەستی بۆ ببرایە، بەتایبەت دوای ئەوەی چەند هێزێکی سیاسی لە پەرلەمانەوە پڕۆژەی چاکسازییان پێشکەش بە حکومەت کرد.


وە لەئێستادا پێویستە حکومەت بەدەستێکی پۆڵاینەوە دەست بکات بەچاکسازی، چونکە پێش ئەوەی خەڵک سودمەند بێت، قەوارەی هەرێم دەپارێزێت لە هەڵنەوەشاننەوە، چونکە ئاشکرایە هەر وڵاتێک کە ئابوری و دارایی سفر بویەوە توانای مانەوەی نامێنێت.


پێویستە حکومەت بەدەستێکی پۆڵاینەوە دەست بۆ ئەم پرسانە ببات:


١ـ بڕینی دوو موچە و سێ موچە و بندیوارەکان.
٢ـ بڕینی خانەنشینی نایاسایی و ناشایستە.
٣ـ شەفافکردنی پرسی نەوت و پێداچونەوەی گرێبەستەکان یان ڕادەستکردنی نەوت بە بغداد.
٤ـ ئیدارەدانی خاڵە سنورەکان و دەرهێنانیان لەدەستی حزب و ئەشخاس.
٥ـ دەرچواندنی یاسایەک بۆ سزادانی گەندەڵکارانی ئێستا و پێشتریش، وە بەدواداچون بۆ سەرمایەکانیان لەژێر ناونیشانی (من أين لك هذا).
٦ـ ڕێکخستنەوە و کەمکردنەوەی موچەی پلە باڵاکان بەیاسا.


پێویستە لەسەر سەرۆکایەتی حکومەتی هەرێم بە پاڵپشتی هەمو هێزە سیاسیەکان بە ئیرادەوە دەست بۆ چاکسازی ببرێت، ئەگەر وانەکرێت، داهاتو باش نابێت، نەک تەنها باری گوزەرانی خەڵک دەشێوێنێت، بەڵکو قەوارەی هەرێمیش مەترسی جدیی لەسەر دروست دەبێت.

647 جار خوێندراوەتەوە