ئەڵێن ئەم كۆرۆنایە چییە كردوتانە بە تەیارە لێمان، سێ هەزار كەسی كوشتوە، خۆ لەو رۆژەوە بە سەیارە و جەڵتە زیاتر لە دو ملێۆن مرۆڤ مردوە، یا دەڵێن فشەیە بایەتەكە زۆرتر سیاسی یە، ململانێی نێوان ئەمەریكا و چین-ە. یا دەڵێن كورد هیچ ڤایرۆسێك  كاری تێناكات، .... سەدان یانی تر.

سەرەتا بە چ پێوەرێك ئێمە خۆمان بەراورد بكەین بە چین، ئەو چاینایەی ئێمە پێی ئەڵێن چین دوەم گەورەترین ئابوری جیهانە، نزیك بە (20%) هەمو مرۆڤایەتی یە بە تەنها.

هەروەها (30%) سەرجەم كارگەكانی دونیا لە چینە، هیچ خێزانێك نی یە لەسەر ئەم زەوییە كەلوپەل یان پێداویستی چینی لە ماڵەكەیدا نەبێت، بە ملیۆن پزیشك و كارمەندی تەندوستی و بە سەدان هەزار تاقیگەو نەخۆشخانە و ناوەندی چارەسەری هەیە. ئەمە سەرباری سەرچاوەیەكی مرۆی زۆر و زیرەك لە تەكنەلۆژیا و زاستە جیاجیاكاندا.

بەڵام لەگەڵ ڤایرۆسی كۆرۆنا، تەنها ئەوەندەی پێكراوە كە ئێستا دەیبیستین.

ئەی ئێمە چی؟ بە چی فشەت بە كۆرۆنا دێت؟
بە ژێرخانی ئابوری داتەپیومان
بە سیستەمی تەندروستی لاوازمان
بە كارگەو بەرهەمی خۆماڵیمان
یا بە رۆشنبیری و تێگەیشتنمان

كێشە كۆرۆنا نییە، ئێمە كێشەین
بەڵێ راستە كۆڕۆنا ئەوەندە كوشندە نییە، بەڵام ئەوە بۆ چین نەك بۆ ئێستای ئێمە.
راستە وردە وردە ژمارەی ئەوانە چاك دەبنەوە زیاتر دەبێت، بەڵام ئەمە بۆ چین نەك بۆ ئێستای ئێمە.

كە دەڵێم ئێمە خۆمان كێشەین بە بەڵگەیە، دەڵێن حەوبرا تەوقە مەكە خراپە، ئەڵێت بەخوا  تەرك ناكرێت، دەڵێن لە ماڵ بمێنەوە و مەچن بۆ شوێنی قەڵەباڵغ، دەڵێت جا خۆ ئەمرم سەرێكی چایخانەی شەعب و ناو بازاڕ نەدەم شەویش ژنەكەی بەزۆر پەلكێشی دەكات بۆ ئەم مۆڵ و ئەو دوكان.

دەڵێن لە رای خوا كحولی پزیشكی و تعقیم هەڵبگرن و بەكاری بهێنن دەڵێت هەر لەئەمەمان كەمبو.
دەڵێن بۆ خاتری خوا تەعزیە، ئاهەنگ، میوانداری و سەردانی نەخۆش مەچن، دەڵێت؛ ئینجا بۆ پەتێك هەڵنەواسین و خۆمان بخنكێنین.
دەڵێن رێنمایەكان وەك خۆی جێبەجی بكەن، دەڵێت دو ڕۆژیتر گەرما دەكات و نامێنێت.

كەواتە خۆمان كێشەین كۆرۆنا عەیبی نیە، خۆمان عەیبمان هەیە، سبەینێ كە پەتاكە بڵاو بوەوە، مەڵێ ئەمە كەی حكومەتە، ئێمەش ئەزانین حكومەت نییە، بەڵام دەبێت بزانیت ئێمەش بەنی ئادەم نین.
ئەگەر بەنی ئادەم بونایە، معقولە لە ئێران بە قاچاخ بێیتەوە و بچیتە ناو ماڵ و مناڵ بەبێ ئەوەی بزانیت هەڵگری ڤایرۆسەكەی یان نا. 

چین زیاتر لە دو مانگە (60) ملیۆن كەسی لە ماڵەكانی خۆیاندا راگرتوە، بەڵام ئێمە نەتوانین (14) رۆژ لە كەرەنتیندا بین، ئەی هاوار ئێمە چ قەومێكین، چۆن مناڵ لە شریقە ڕادەكات، ئەم هەمو زرتە بۆزە لەترسی كەرەنتین رایانكردوە.

ئاخر ئێرانیش وەك ئێمە قەشمەری بە ڤایرۆسەكە دەهات، دەیوت گەشتەكانمان لەگەڵ وڵاتی چینی دۆستمان راناگرین.

ئێستاش كات ماوە، دەتوانین بە زەرەرێكی كەم لێی دەرچین، مەچۆ سەرە بگری بۆ کڕی دەمامك نە گاڵتەت بە ڕێنمایە پزیشكی یەكان بێت.

كورد دەمێكە وتویەتی خۆپاراستن باشترە لە چارەسەر، دەی مەهێڵە توش بیت، دوای نەخۆشخانەت دەست ناكەوێت چارەسەرت بكات. یەك جار دەڵێن زستان ساردە، یەك جاریش دەڵێن ئێمە چین نین، هاوسێی ئێرانین، خۆت خۆت بپارێزە، ئەم دەسەڵاتەی هەرێم نەخۆشخانەی هەزار قەرەوێڵەیی پێ دروست ناكرێت.