گۆڕان لەنێوان قەیران و کارەسات-دا

بیرمەندانی بواری ستراتیژ و کارگێڕی، جەخت لەوە دەکەنەوە، قەیران لێکەوتەی چەند روداوێکی کەڵەکەبوی چارەسەرنەکراوە، کاتێک روداوەکان یا گرفتەکان لە زەمەن و شوێنی خۆی چارەسەر ناکرێن دەبنە قەیران، ئەوکات لە روداوی ئاسایی واتە لە (کێشە) دەردەچن و ئاڵۆزتردەبن.

کەواتە بەوپێیە گرفت یان کێشە، لە قەیران بچوکتر و سادە ترە، هەروەها قەیرانیش لە کارەسات بچوکترە، وەک چۆن گرفتەکان دەبنە قەیران، قەیرانیش ئەگەر نەقۆزرێتەوە و چارەسەر نەبێت دەبێتە کارەسات.

هەروەها ستراتیژناسەکان سەلماندویانە؛ قەیران خەسڵەتێکی هەیە کە دەشێت سودی هەبێت و دامەزراوە یا رێکخراوی لەسەر بونیادبنرێتەوە، ئەو خەسڵەتەش ئەوەیە قەیران دەبێتە زەنگی بەئاگاهاتنەوە، کە دەشێت سود لەو زەنگە وەربگیرێت بۆ ئایندە، نمونەی وا لەجیهاندا زۆر رویداوە، لەنێوان هەردوو جەنگی جیهانی یەکەم و دووەم؛ ئەمریکا دوچاری دەیان قەیرانی ئابوری و دارایی بوو، تەنانەت زۆربەی کارگە و بانکەکانی مایەپوچبوون، بەڵام سودیان لەو قەیرانە وەرگرت و خۆیانیان لەسەر بونیادنایەوە، وڵاتی کۆریای باشور لە دوای جەنگی جیهانی  دووەم و سەربەخۆیی وڵاتەکەی؛ بەقەیرانی شەڕی ناوخۆ و کودەتا و برسێتی و قاتوقڕی و گەندەڵی تێپەڕی، بەڵام دواجار سودییان لەو قەیرانانە وەرگرت و خۆیان لەسەری بونیادنایەوە و ئێستا یەکێکە لە گەشەسەندوترین وڵاتی پیشەسازی.

ئەگەر قەیران بکرێتە ئامڕاز بۆ بە خۆداچونەوە، سودەکەی زۆرترە وەک لە زیانەکەی، بەڵام بێگومان ئەگەر چاوپۆشی لێبکرێت، ئەوا بە ئاڕاستەی کارەساتدا دەڕوات و دەبێتەهۆی داتەپینی یەکجاری دامەزراوەکە.

کەواتە ئەوەی ئێستا دوچاری بزوتنەوەی گۆڕان بۆتەوە، قەیرانێکی کوشندەیە، ئەگەر سودی لێوەربگیرێت و بکرێتە زەنگی بەهۆشخۆداهاتنەوە، دەشێت لە جاران بەهێزتری بکات، بەڵام ئەگەر فەرامۆش بکرێت، ئەوا بەرەو کارەساتی یەکجاری دەبات.  

296 جار خوێندراوەتەوە