وەزارەتی نەوتی عێراق ڕایدەگەیەنێت، کارەکانی نۆژەنکردنەوە و خستنەوەگەڕی بۆری هەناردەکردنی نەوتی خاوی فیشخابوور - جەیهان گەیشتووەتە قۆناغی کۆتایی، کە توانای هەناردەکردنی لە 600 هەزار بەرمیلەوە دەستپێدەکات و تا یەک ملیۆن و 600 هەزار بەرمیل نەوت لە ڕۆژێکدا بەرز دەبێتەوە.

ساحیب بەزون، وتەبێژی وەزارەتی نەوتی عێراق بە ڕۆژنامەی فەرمی وڵاتەکەی ڕاگەیاندووە، ئامانجی پڕۆژەکە بەرزکردنەوەی توانای هەناردەکردنی نەوتی عێراقە و هۆکاری دواکەوتنی کارەکانیش بۆ ڕێکارە تەکنیکییەکان دەگەڕێتەوە.

 ئاماژەی بەوەشکردووە، بۆرییەکە هیچ کێشەیەکی جەوهەری نییە، بەڵام بەهۆی ئەوەی بۆ ماوەیەکی زۆر پشتگوێخراوە و لە کاتی کۆنتڕۆڵکردنی ناوچەکان لەلایەن چەکدارانی داعشەوە زیانی بەرکەوتووە، پێویستی بە پشکنینی گشتگیر و چاککردنەوە هەبووە.

وتەبێژەکەی وەزارەتی نەوت ڕوونیکردووەتەوە، لە ئێستادا کارەکان تایبەتن بە پشکنینی هایدرۆستاتیکی بۆ بەشی کۆتایی بۆرییەکە و گۆڕینی پەمپەکان بۆ دڵنیابوون لە کارکردنی بە سەلامەتی.

جەختیشی لەوە کردووەتەوە کە بەگەڕخستنەوەی ئەم بۆرییە، دەبێتە هۆی بەرزبوونەوەی قەبارەی هەناردەکردن و سەقامگیرکردنی پرۆسەی دابینکردنی نەوت.