بەرەبەیانى ئەمڕۆ سوپاى تورکیا سنورى ناحیەى شیلادزێی بۆردومانکرد و بەهۆیەوە هاوڵاتییەک کە پیشەى پێشمەرگەیە شەهیدبو، ئەندامێکى رێکخراوى سی پی تى ئەمەریکیش دەڵێت: تەنها لەمساڵدا نۆ هاوڵاتیی مەدەنى بە بۆردومانەکانى تورکیا شەهیدبون.

هەواڵ:KNNC

کامەران عوسمان، ئەندامى رێکخراوى سی پی تى ئەمەریکى ئاشکرایکرد؛ لە کاتژمێر 5:25 خولەکی سەر لە بەیانی ئەمڕۆدا، فڕۆکە جەنگییەکانی سوپای تورکیا بۆردومانی گوندی (بەریسکێ)یان کرد لە ناحیەی شیلادزێی سەر بە قەزای ئامێدی و لە ئەنجامی ئەو بۆردومانەدا، هاوڵاتییەک بە ناوی (عوسمان رژدی رێکانی) تەمەن 32 ساڵ شەهید بو.

ئاماژەى بۆ ئەوەشکرد کە قوربانییەکە پیشەى پێشمەرگە بوە و لەکاتى هەنگەوانیدا پێکراوە.

ئەو ئەندامەى رێکخراوە ئەمەریکییەکە ئەوەشى ئاشکرا کردوە کە ئەمساڵ ئەمە دوەمجارە تورکیا بۆردومانى گوندى بەریسکێ دەکات و هاوڵاتییانى مەدەنى بەئامانج دەگرێت و لەمانگى سێی ئەمساڵ هەر لەو گوندە چەند هاوڵاتییەک شەهید و بریندار بون.

رایشیگەیاندوە؛ لەمساڵدا، بەهۆی بۆردومان و هێرشەکانی سوپای تورکیا لە خاکی هەرێمى کوردستان، نۆ هاوڵاتی مەدەنی شەهیدبون و دوو هاوڵاتی تری مەدەنیش برینداربون.