هەرێم سوپاسى ئیتاڵیا دەکات بۆ هاوکارییە بەردەوامەکانى

10:25 - 29/09/2020
کوردستان

سەرۆکایەتى هەرێمى کوردستان لەگەڵ وەزیرى بەرگرى ئیتاڵیا کۆبونەوە و هەڕەشەى گروپە چەکدارەکان لە نێردە دیبلۆماسییەکان و جموجۆڵەکانى داعش تاوتوێکران.

ئەمڕۆ سێشەممە، وەزیرى بەرگرى ئیتاڵیا و لەگەڵ سەرۆکى هەرێم و جێگرەکەى کۆبوەوە، بەپێی راگەیێندراوی سەرۆکایەتیی هەرێمی کوردستان، دۆخى ئه‌منيى عێراق و هه‌ڕه‌شه‌ى گروپه‌ چه‌كداره‌كان له‌ نێرده‌ ديپلۆماسييه‌كان و هه‌ڕه‌شه‌ و جموجووڵه‌كانى داعش تاوتوێ كراون.

باس لەوەشکراوە، هه‌ردوولا جه‌ختيان له‌ گرنگى و پێويستيى به‌رده‌واميى كارى هاوبه‌ش و ئه‌ركى هاوپه‌يمانيى نێوده‌وڵه‌تيى دژى داعش له‌ عێراق كردووەتەوە، "هاوڕا بوون هێشتا عێراق و هه‌رێمى كوردستان پێويستيان به‌ هاوكارى و پشتگيريى هاوپه‌يمانيى نێوده‌وڵه‌تى هه‌يه‌.

نێچیرڤان بارزانی، سەرۆکی هەرێمی کوردستان، سوپاس و پێزانينى هه‌رێمى كوردستانى بۆ ئيتاڵيا دووپاتكرده‌وه‌ كه‌ هاوکارى سه‌ربازى و مرۆيى پێشكه‌ش به‌ هه‌رێمى كوردستان و عێراق كردوه‌.

لەبارەی دوایین پێشهاته‌كانى دۆخى عێراقيش، سەرۆکى هەرێم رایگەیاندوە:‌‌ هه‌رێمى كوردستان به‌ نيگه‌رانييه‌وه‌ له‌ پێشهاته‌ ئه‌منييه‌كانى عێراق و هه‌ڕه‌شه‌ى گروپه‌ چه‌كداره‌كان له‌ نێرده‌ ديپلۆماسييه‌كان ده‌ڕوانێت.

وتیشى:"ئه‌ركى نێرده‌ ديپلۆماسييه‌كان و هاوپه‌يمانيى نێوده‌وڵه‌تى عێراق گرنگە، بۆ هاوكارى و پشتگيرييه‌ له‌ عێراق و ده‌بێت سه‌لامه‌تى و ئاسايشيان بپارێزرێت، هه‌رێمى كوردستانيش هه‌موو پشتگيرييه‌ك له‌ هه‌نگاو و رێكاره‌كانی مسته‌فا كازمى، سەرۆکوەزیرانی عێراق بۆ رووبه‌ڕووبوونه‌وه‌ى هه‌ڕه‌شه‌كان ده‌كات".

218 جار خوێندراوەتەوە