عەلی خامنەیی لە پەیامێکدا کە بە بۆنەی یادی چلەی کوژرانی فەرماندەکانی سوپای پاسداران و زانا و کارمەندانی بەرنامە ئەتۆمییەکان لە هێرشەکانی ئیسرائیلدا ڕایگەیاند: هێرشەکان زەبرێکی قورس و بەهێز بون، بەڵام دوژمنی گەمژە و کورتبین بە ئامانجەکەی نەگەشت.

هەواڵ:KNNC

 
عەلی خامنەیی ڕێبەری کۆماری ئیسلامی لە پەیامێکدا کە بە بۆنەی چلەمین ساڵڕۆژی کوژرانی ژمارەیەک فەرماندە و کەسایەتیی پەیوەندیدار بە بەرنامە ئەتۆمییەکانی کۆماری ئیسلامی لە هێرشەکانی ئیسرائیلدا،ڕایگەیاند هێرشەکان زەبرێکی قورس و بەهێز بون، بەڵام دوژمنی گەمژە و کورتبین بە ئامانجەکەی نەگەشت.

ناوبراو جەختی کردەوە کە دەبێت هەوڵبدرێت  ڕێوشوێنی بەرفراوانتر لە بواری ئەمنی، زانستی و کۆمەڵایەتیدا بگیرێتەبەر و  لەم پەیامەدا جەختی لە "پێویستی پاراستنی یەکێتی نەتەوەیی" کردەوە و بە "ئەرکێکی گشتگیر"ی زانی.

 خامنەیی هەروەها داوای لە فەرماندە سەربازییەکان کرد کە "زیاتر وڵات بە ئامرازەکانی پاراستنی ئاسایشی نەتەوەیی و سەربەخۆیی تەیار بکەن" و داوای زاناکانی وڵاتەکەشی کرد "بە خێرایی بەرەو پێشخستنی زانست و تەکنەلۆژیا لە هەموو کەرتەکاندا هەنگاو بنێن".

خامنەیی لە بەشێکی دیکەی پەیامەکەیدا بۆ "پیاوانی ئایینی" داوای لێکردن کە بە پێشکەشکردنی "ڕێنمایی ڕۆحی" و "ئامۆژگاریکردنی خەڵک بۆ سەبر و خۆڕاگر" ڕۆڵی خۆیان لە دۆخی ئێستادا بگێڕن.

لە کۆتایی پەیامەکەشیدا دەڵێت؛  داهاتو ئەوە نیشاندەدات کە هەردو بزوتنەوەی سەربازی و زانستی زیاتر پێشدەکەون و بەرەو ئاسۆی گەشتر دەڕۆن