کاتێک وێنەیەکی جوان پێشکەشدەکەی لە حوکمڕانی، دەوڵەتداری، دیمۆکراسی، سیاسەت، پێکەوەژیان، عەدالەت و مافی ئینسان، هیچ پێویستیت بە شەکانەوەی ئاڵا نییە چونکە ئەمانە خۆیان دەبنە ئاڵا و وێردی سەر زمانی خەڵک.

ئەمانە لەسەر روخساری هەر نیشتیمانییەک دەشەکێنەوە و ناسنامەی وڵات دەبن. بەڵام کاتێک هیچ لەمانەت نین، ناشتوانی وەڵامدەرەوەی دروستکردنی دۆخێکی وا بی، هەڵبەتە ناتوانی ئاڵا بەبەرزی رابگری و دەبێ هەوڵی گەوجاندن بدەیت.

بۆئەوەی ئاڵامان شەکاوە بێ، پێویستمان بە ئیشە ئیش نەک خۆنماییشکردن. پێویستمان بە مەعریفەیە لە زانکۆکان نەک حیزبایەتی. پێویستمان بە عەدالەتی کۆمەڵایەتییە تا نیشتیمانییان هەستنەکەن "٢٣ ساڵە لەژێر ئاڵای کوردستان ئازار دەچێژن". 

ئێمە ئازاترین نەتەوەین لە کروزانەوە و خۆنیشاندان بەزەلیلی و چەوساوەیی. کارامەترین نەتەوەین لە شاردنەوەی کەموکوڕییەکانمان بە گوتاری قەبەقەبە و پفدراو. چالاکترین نەتەوەین کە بە مۆب دەجوڵێین بۆ کاری سادە. ئێمە کاری گەورەمان لەدەستنايێ هەربۆیە بە کاری بچوک تێنویەتیی گەورەیی شکۆمان دەشکێنین.

ئەو کۆمەڵگە روکەشە و ئەو گەنجە سادە-بیر و ئەو زانکۆیە پڕ جەهلانە و ئەو سەرکردە بێ ستراتیژ و ئەو رۆشنبیر و میدیایە بێ مەعریفانەمان کە تا ئێستا نەیانتوانیوە شکۆی ئینسانی کورد دروستبکەنەوە، نەیانتوانیوە تا ئێستا ناسنامەی کوردیی دروستبکەنەوە، نەیانتوانیوە تا ئێستا زمانی کوردیی دو هەنگاو پێشبخەن، نەیانتوانیوە هەنگاوێک دەوڵەتداریی کوردیی پێشبخەن و پڕۆژەی نیشمانیی کوردستانیی وێنەبکەن، هەڵبەتە زۆر لەسەر پێ دەبن بۆ "رۆژی ئاڵا" کە تا ئێستاش پێیانوایە تیشکەکانی رۆژەکەی ناو ئاڵا دەبێ بیست و یەک بن چونکە "٢١ی ئادار" سەرەتای دەستپێکردنی ساڵی کوردییە!

بەر لە هەر شتێک، پێویستە ئەوە یەکلایی بکەینەوە ئەم ئاڵایە ئاڵای کوردستانی باشور/کوردستانی عێڕاق/باشوری کوردستانە نەک ئاڵای چوار پارچەی کوردستان. ئێمە ناکرێ ئاڵای ئەو پارچەیەی کوردستان بسەپێنین بەسەر پارچەکانی دیکەی کوردستان دا،

پارچەکانی دیش هەقی خۆیانە ئاڵای خۆیان هەبێ لایکەم ئێستا پڕۆژەی کوردستانی گەورە لای هیچ هێزێکی سیاسیی و رۆشنبیریی کوردیی نییە.

هەوڵدان بۆئەوەی ئەو ئاڵایە بکرێتە ئاڵای هەمو کورد جگە لە ئاژێندایەکی پاوانخوازیی هەندێ سەرکردە و هێزی هەرێمی کوردستان، هیچی تر نییە.

بۆ من رۆژی ئاڵا، واتا رۆژی دوبارە تێڕامان لەو ئاڵایە؛ دەبێ چی بکەم بۆ ئەو ئاڵایە بەبەرزی بشەکێتەوە و تا بەبەرزی بمێنێتەوە، بەرزییەک بەقەد باڵای دیمۆکراسییەکی راستەقینە، عەدالەتێکی دروست، حوکمڕانییەکی ژیاندۆست، سیستەمێکی سیاسیی کە تێیدا مافی ئینسان و ئازادیی رادەربڕین رێزلێگیراون.

چییە وا دەکات رێگای مەرگ بۆ گەیشتن بە نەرویژ هەڵبژێرین؛ ئاڵایە؟

هیچ ئاڵایەک نییە لە دونیادا ناشیرین بێت، یان لای وڵاتییانی رێزلێگیراو و خۆشەویست نەبێت. لەگەڵ ئەوەشدا، ئەوەی بەها بە ئاڵا دەدات و بەهای ئاڵایەک لە ئاڵایەکی تر جیادەکاتەوە، نە رەنگیەتی، نە جوانییەکەی، نە شێوە و قەبارەی. ئەوەی بەها بە ئاڵا دەدات ئەو واقیعە سیاسیی، کۆمەڵایەتیی، ئابوریی و کەلتوریییەیە کە ئاڵا نوێنەرایەتیی دەکات.

ئەوەی ئاڵای نەرویژ لە ئاڵای عێڕاق و کوردستان و سوریا و ئێران جیادەکاتەوە و وا دەکات خەڵک خەون بەوەوە ببینێت لەژێر ئاڵای نەرویژ بژیێت و چەندان ساڵ چاوەڕێبکات تا ببێتە نەرویژیی و رێگاکانی مەرگ تاقیبکاتەوە تا بەوێ دەگات؛ حوکمڕانیی، دیموکراسیی، عەدالەتی کۆمەڵایەتیی، زانکۆکانی، داهێنانەکانی نەرویژ، ئابوریی، سیاسەت، دۆخی ئازادییەکان و سیستەمی سیاسیی نەرویژە، ئەگەرنا، لەوانەیە بەو کەسانە ئاووهەوای سوریا و عێڕاق و ئێران و کوردستان لە نەرویژ خۆشتر بێت، خاکەکەی دەوڵەمەندتر بێت و دڵ ئاسودەتر بێت لە نیشتیمان.

کەس نییە لە کوردستان دژ بە ئاڵا بێت، بەڵام خەڵک دەیەوێت بەها بە ئاڵا بدات بەر لەوەی ئاڵا وەک کاڵایەک بۆ بانگەشەکردن و گەوجاندن و گەمژاندن بەکاربهێنرێت.
هیوادارم قوڵتر بڕوانن و تیژتر بیربکەنەوە.