بەرنامەی (رۆژەڤ)ـی کاک جوانرۆ محەمەد لەگەڵ ژمارەیەک لە گەنجانی کفری لە کەناڵی KNN، گەر شایستەیە بۆ نرخاندن بێت ئەوا لە دو ئاڕاستەدایە:  لە لایەکەوە مایەی دەسخۆشییە بۆ میدیاکارێکی کوردستان بگاتە ئەو ئاستە بەرزە لە لێپرسراوێتی کە لەم دۆخە سیخناخە بە خۆپەرستی و داڕزانی سیاسی بتوانێ بەرنامەیەکی وا تێروتەسەل لەگەڵ هاوڵاتییانی شارێکی دێرینی کوردستان ساز بدات، لە لایەکی تریشەوە مایەی گریان و توڕەییەکی زۆرە گەر ببینین خوشک و براکانمان لەو شارە ئازیزەدا بە بەرزترین ئاستی هۆشیاری و ئەدەبەوە هاوار دەکەن:

** شارەکەمان سەنگەری بەرگرییە و کەس داکۆکیمان لێناکات

** ناعەداکەتی بەرامبەر شارەکەمان  ناکرێت بەڵکو ستەم و زوڵمیکی ئاشکرامان لێدەکرێت

**  بە پێچەوانەی زۆرینەی خەڵکی کوردستان و عێراقەوە خوازیارین باران نەبارێت، چونکە بارانبارین دەبێتە مایەی روخانی دەیان و سەدان شوێنەواری مێژویی

** هەزاران دۆنم زەوی بەراو و پشتئاوی بەپیت لە شارەکەماندا هەیە بەڵام کەس بایەخی پێنادات

** تا ئێستا 150 پڕۆژەی جیاجیا لە شاری کەلار جێبەجێکراوە و یەک تاقە دانەیش بۆ کفری ئەنجامنەدراوە لە کاتێکدا ئیدارەی گەرمیان پێکهاتوە لە کەلار و کفری.

 بەداخەوە بۆ حکومەتی هەرێمی کوردستان و دۆخی شپرزە و  نابەرپرسانەی بەرامبەر شاری کفری.

بەداخەوە بۆ حکومەتیک کە بە حساب پێی وایە چاکسازی دەکات بەڵام ئاگاداری ئەوە نییە لە نێوان دوو شاری سەرسنور و هەستیاردا یەکیان سەدو پەنجا پڕۆژەی بۆ جێبەجێکراوە و ئەویتریش وەک مناڵێکی هەتیو فڕێدراوەتە بەردەم کۆنەفاشیست و تازە داعش و رەگەزپەرستەکانی ناوخۆ و دەرەوەی شار.

مایەی گریانە بەراستی..
مایەی شەرمە بە راستی..

گەر نیوەی خاکی کوردستانتان بەبەهانەی پوچی قەومی و دەهۆڵی دۆستە درۆزنەکانتان لە کاتێکی ناوەختدا لەدەستدا ئەدی بەهانەتان چیە بۆ  وەلکردن و چاو داخستن لە ئاقار داوا رەواکانی خەڵکی کفری؟
مەگەر کفری کوردستان نییە؟

یان ئێوە کوردستان لە چوارچێوەی گەڕەکی ملیۆنەرەکان و گوندە کەشخەکانی هەولێر و ڤێللا رازاوەکانی سەرچیا فێنکەکان دەبینن و بەس؟

ئەم دۆخەی کفری شایستەی گریان و توڕەییەکی دەستەجەمعی و  پرسینەوەیەکی یاساییە لە سەرجەم ئەو کاربەدەستە پلە یەک و دوانەی کفری یان بەم رۆژە گەیاند.

بەڵێ بە دڵنیایییەوە ئێوە کفریتان بیرچوەتەوە.