ئەم قسانە بە پلاسخارت بڵێن

ماوەیەکە جینین پلاسخارت نوێنەری نەتەوە یەکگرتووەکان لەعێراق مانۆری سەردان و دانیشتن و گفتوگۆکانی لەگەڵ حزبە کوردییەکان و سەرکردەکانیاندا دەستپێکردووە، گوایە بۆ دوو مەبەستە، یەکەم مەترسی لەسەر هەرێم هەیە، دووەم جەختکردنەوە لە ئەنجامدانی پرۆسەی هەڵبژاردن.

دەبێت و پێویستە سەرکردەی ئەو حزبانەی دەرەوەی یەکێتی و پارتی چەند حەقیقەتێک بەو خاتونە بگەیەنن و جەریئانە و زیرەکانە پەردە لەسەر زۆر زانیاری و بابەت هەڵماڵن کە پێشتر دو حزبە قۆرخکارەکە ئەنجامیانداوە و بەردەوامن لەسەری.

یەکێک لەو زانیاری و بابەتانە ئەوەیە بە پلاسخارت بگەیەنرێت کە هەڵبژاردن ئێستا بکرێت یان دوو ساڵی تر، هیچ لەدۆخەکە ناگۆڕێت و هەر ئەو دوو حزبە زۆرینە دەبن، بە دو رێگا (یەکەم ساختەکاری و فێڵی یاسای هەڵبژاردن و داتای ناڕاستی دەنگدەران و مردووان، دووەم هێزی سەربازیی و ئەمنیی و بەکارهێنانیان لەپێش و کاتی پرۆسەکەدا)، کەواتا ئەنجامدانی هەڵبژاردن لەهەرێمی کوردستان تەنها و تەنها نوێبوونەوەی بەردەوامیی دو حزبەکەیە لەحوکمڕانیدا و هیچ لەدۆخەکە ناگۆڕێت و دوای پرۆسەکەش دیسانەوە بەردەوام ئەبن لە گەندەڵیی و حزبایەتیی نێو سەربازیی و قۆرخکاریی.

بەڵام پرسیارەکە ئەوەیە، ئایا سەرکردەکانی دەرەوەی دوو حزبەکە دەتوانن ئەو بابەتانە بگەیەنن بەنوێنەرەکەی یو ئێن؟.

232 جار خوێندراوەتەوە