مەسعود پزیشکیان، سەرۆککۆماری ئێران ڕایگەیاند، هەر هەوڵێک بۆ سەپاندنی سنووردارکردن و گەمارۆی دەریایی بەسەر ئێراندا، دژایەتییەکی ئاشکرای یاسا نێودەوڵەتییەکانە و چارەنووسی شکستە.

سەرۆککۆماری ئێران ئاماژەی بەوەش کرد، کە ئاوە هەرێمییەکان مەیدانێک نین بۆ سەپاندنی بڕیاری تاکلایەنە، بەڵکو بەشێکن لە سیستەمی نێودەوڵەتی و ئاسایشەکەیان لەسەر بنەمای هاوکاریی پێکەوەیی دادەمەزرێت.

پزیشکیان جەختی لەوە کردەوە کە دوژمنانی وڵاتەکەی شێوازی ڕووبەڕووبوونەوەیان گۆڕیوە و پەنایان بردووەتە بەر فشاری ئابووری و گەمارۆی دەریایی دژی حکومەت و گەلی ئێران.

 وتیشی: "بوونی هێزە بیانییەکان لە ناوچەکەدا گرژییەکان زیاد دەکات و دەبێتە هۆی ناسەقامگیری لە ئاوە هەرێمییەکاندا و هیچ خزمەتێک بە بەهێزکردنی ئاسایشی ناوچەیی ناکات".

سەرۆککۆماری ئێران ئاماژەی بەوەش کرد، ئێران وەک پارێزەری ئاسایشی ئاوە هەرێمییەکان و گەرووی هورمز، پابەندە بە ئازادیی کەشتیوانی و دابینکردنی ئاسایش بۆ هەموو وڵاتان، جگە لەو لایەنانەی کە بە "دوژمنکار" ناوی بردن.

 لە کۆتایی وتەکەیدا پزیشکیان ڕایگەیاند: "گەرووی هورمز بەشێکە لە ناسنامەی نیشتمانیمان و هێمای خۆڕاگری گەلەکەمانە لە بەرامبەر هێزە داگیرکەرە کۆن و نوێیەکاندا".