سەرۆکوەزیرانی پێشووی ئیسرائیل هۆشداری دەداتە ئەنقەرە و رایدەگەیەنێت، ئەگەر تورکیا بیەوێت بە تیرۆر گەمارۆمان بدات، ناچار دەبین دوای ئێران رووبەڕووی ئەو وڵاتە ببینەوە.

نەفتالی بنێت سەرۆکوەزیرانی پێشووی ئیسرائیل لە چاوپێکەوتنێکدا لەگەڵ ئاژانسی بلۆمبێرگ رایگەیاند: ئەگەر تورکیا هەوڵی هاوپەیمانییەکی نوێی ئیسلامی بدات لە ناوچەکەدا، رەنگە دواجار ناچار بین دوای ئێران رووبەڕووی ئەو وڵاتەش ببینەوە.

ئەوەشی خستەڕوو: هەر هاوپەیمانییەکی لەو چەشنە، لەلایەن ئیسرائیلەوە وەک بەرەیەکی دوژمنکارانە و هەڕەشەیەکی راستەوخۆ بۆ سەر ئاسایشی نەتەوەیی دادەنرێت و بەرامبەر بەو هەڕەشەیە دەستەوەستان نابێت.

روونیشی کردەوە، کە دەیانەوێت دڵنیابن لەوەی ئەردۆغان نایەوێت هیچ هاوپەیمانێتیەکی نوێی ئیسلامی توندڕەوی سوننە لە نێوان وڵاتەکەی، سوریا و قەتەر سازبکات.

سەرۆک وەزیرانی پێشووتری ئیسرائیل ئامۆژگاری بەرپرسانی تورکیاشی کرد کە ئایندەی پەیوەندییەکانی نێوان هەردوو وڵات پەیوەستە بە بڕیارەکانی ئەنقەرە و ئەوەی کە ئاشتی دەوێت، یاخود هەوڵ دەدات بە تیرۆر ئیسرائیل گەمارۆ بدات، کە لە وەها حاڵەتێکدا تەلئەبیب دەستەوەستان و بێ کاردانەوە نابێت.