تاران رەتی دەكاتەوە لە ئاستێكی باڵاتر لە وەزیری دەرەوە دانوستان لەسەر بەرنامە ئەتۆمییەکەى لەگەڵ واشنتۆن ئەنجام بدات.


هەواڵ: (KNNC)


لەو بارەیەوە، ئیسماعیل بەقائی، وتەبێژی وەزارەتی دەرەوەی ئێران رایگەیاند: خولی چوارەمی دانوستانەکانى نێوان تاران و واشنتۆن بەسەرپەرشتی هەریەک لە عەباس عراقچی، وەزیری دەرەوەی وڵاتەکەى و ستیڤ ویتکۆف، نوێنەری تایبەتی دۆناڵد ترەمپ، سەرۆک کۆماری ئەمەریکا دەبێت، نەك باڵاتر.


وتیشی:  بۆ درێژەدان بە دانوستانەکان کۆمارى ئیسلامی ئێران ئامادەی دانوستانە، چونکە سزا سەپێنراوەکان ژیانی رۆژانەی هاوڵاتیانی وڵاتەکەى بەئامانج دەگرێت و تاران هەوڵی جدی دەدات بۆ  هەڵگرتنی ئەو سزایانە.


وتەبێژی وەزارەتی دەرەوەی ئێران رونیکردوەتەوە، لەسەر کات و شوێنی گەڕی ئایندەی دانوستان لەگەڵ واشنتۆن ئەمەریكا، هەروەها وڵاتەكەی سنوری بۆ رەوتی دانوستانەکان دانانێت، بەمەرجێک رێککەوتنی هاوبەش لە نێوانیاندا ئەنجام بدرێت.


لەدوای كۆتایی هاتنی گەڕی سێیەمی دانوستانی نێوان ئێران و ئەمەریكا لەسەر بەرنامە ئەتۆمییەكەی تاران، وەزیری دەرەوەی عوممان بەرۆژنامەنوسانی راگەیاند: پێدەچێت دانوستانەكان لە ئاستێكی باڵاتر لە وەزیری دەرەوەی ئێران و نێردەی تایبەتی كۆشكی سپی بەڕێوەبچێت، هاوكات دۆناڵد ترەمپیش ئاماژەی بۆ ئەوەكردبو، ئامادەیە لەگەڵ عەلی خامنەیی، رابەری شۆڕشی ئێران كۆببێتەوە.


دوای هەفتەیەك لە گەڕی دوەمی دانوستانی نێوان تاران و واشنتۆن لە رۆما، گەڕی سێیەمی لە مەسقەتی پایتەختی عوممان ئەنجامدرا، لەگەڵ ئەوەی كە شوێن دیارینەكراوە، پێدەچێت گەڕی چوارەمی دانوستان لە ئەوروپا بەڕێوەبچێت.