ئاساییشی ناوخۆی حەلەب دڵنیایی دەداتە هاووڵاتییانی شێخ مەقسود و ئەشرەفییە و دەڵێت خەمی هیچ شتێکتان نەبێت ئێمە لێرەین و تا دوا دڵۆپ خوێن بەرگریی دەکەین.

هەواڵ:KNNC

ئاساییشی ناوخۆ ڕاگەیەندراوێکی لەبارەی ئاڵۆزییەکانی حەلەب بڵاوکردەوە و دڵنیاییدا لە پاراستنی ناوچەکە تا دوا دڵۆپی خوێن.

ئاساییش وتویەتی، سەرۆکۆنەی ئەو هێرشە دڕندانانەی گروپەچەکدارە ناپاکەکانی سەر بە دیمەشق دەکەن بۆسەر گەڕەکەکانی شێخ مەقسود و ئەشرەفییە و بەنی زەید دەکەن، کە پێشێلی تەواوی یاسا و پێوەرە مرۆییەکانە و زیانی گیانیی و ماڵییان هەبووە.


ئاماژەی بەوەشداوە، پەرەسەندنی ئێستا دەرئەنجامی ڕاستەوخۆی ئەو سیاسەتە شەڕانگێزانەیە و دووبارەبوونەوەی ئیستفزازییە کە ئەم کوتلانە ئەنجامی دەدەن، لە سەپاندنی گەمارۆیەکی ئەمنی و مرۆیی خنکێنەرەوە تا هەوڵدان بۆ دەستدرێژیکردن بە تانک و زرێپۆش و بە ئامانجگرتنی گەڕەکەکانی نیشتەجێبوون بە هاوەن و درۆنی بۆمبڕێژکراو و موشەکی گراد و فڕۆکەی بێفڕۆکەوان.

ئاسایشی ناوخۆ داوای لە هاووڵاتییان کردوە لە ماڵەکانیان بمێننەوە و وتویەتی "داوا لە گەلەکەمان دەکەین لەو گەڕەکانە لە ماڵەکانیاندا بمێننەوە و بە هەواڵ و دەنگۆی ناڕاست کە ئامانجیان ئاوارەبوون و دروستکردنی دۆخی کۆچکردنە، هەڵنەخەڵەتێن چونکە ئەوانە دەیانەوێت کورد بترسێنن و ناتەبایی دروستبکەن، هەروەها با هاووڵاتییان لە نزیکەوە هاوکاریی هێزەکانی ئاسایشی ناوخۆ بکەن، وەک هەمیشە دەیانناسین و بە دڵسۆزی و نیشتمانپەروەرییەوە پاڵپشتییان بکەن.

ئاساییش حکومەتی بەرپرسیار کردوە و وتویەتی " وێڕای بەرپرسیارێتی تەواو و ڕاستەوخۆی حکومەتی دیمەشق لەم پێشێلکاریانە و ئەو پەرەسەندنە مەترسیدارەی کە مەترسی لەسەر ژیانی هەزاران هاوڵاتی مەدەنی هەیە و سەقامگیری شارەکە تێکدەدات، داوا لە ڕێکخراوە نێودەوڵەتییەکان و ئۆرگانەکانی مافی مرۆڤ و دەکەین بەرپرسیارێتی خۆیان لە ئەستۆ بگرن و هەنگاوی خێرا بگرنەبەر و فشاربکەن بۆ ڕاگرتنی ئەم هێرشە شەڕانگێزانە و هەڵگرتنی ئەو گەمارۆ ناڕەوایانەی کە سەپێنراون لەسەر دانیشتوانی گەڕەکە کوردییەکان."

دڵنیاییشی داوە لە پاراستنی ناوچەکان و بە هاووڵاتییانی وتوە خەمی هیچتان نابێت ئاساییش بوونی هەیە و تا دوادڵۆپ بەرگری لە خاک و خەڵک دەکات و بە توندی بەرپەرچی هەر هێرشێک  دەداتەوە کە دەکرێتە سەر هاووڵآتییان و سازش لە پاراستنیان ناکات...