لێدان لەبەرژەوەندی ڕۆحی چاکسازییە

گەندەڵی چەندە دیاردەیەکی (سیاسی، ئابوری، کارگێڕی)ـە، ئەوەندەش زیاتر دیاردەیەکی کۆمەڵایەتیە، بۆیە چەند گرنگە چاکسازی لە سیاسەت و مۆدێلی حکومڕانی بکرێت، ئەوەندەش گرنگە چاکسازی لە کردە کۆمەڵایەتیەکان بکرێت، هەربۆیە تاوەکو ئەقڵ و تێگەیشتن و تێڕوانینە کۆمەڵایەتیەکان نەگۆڕدرێن، گۆڕینی سیستەم و شێوازی بەڕێوەبردن ئاسان نیە.

دەستپێکی پڕۆسەی چاکسازی ئەوەیە بزانین بۆ ئەنجامدانی چاکسازی پشت بە چ پرەنسیپێک دەبەستین (کام تێزی بیرمەندی کارگێڕی، کام دامەزراوەی دارایی، چ جۆرە سیستەم وشێوازی کارگێڕی، کام قوتابخانەی کارگێڕی).

لەچاکسازیدا کۆمەڵێک بەرژەوەندی مەترسیان لەسەرە و لەناودەچن، لەهەمانکاتدا ئەم لێدان لە بەرژەوەندیانە بنەمایەکی بنەڕەتیە بۆ دروستکردنی پاشەڕۆژی وڵات، لەوەش گرنگتر نابێت لەچاکسازیدا موراعاتکردن هەبێت چ بۆ گروپ چ بۆ تاک، بەپێچەوانەوە هەر موراعاتکردنێک بۆ هەرکەس و لایەنێک لە ژێر هەر پاساوێکدابێت خودی گەندەڵی راستەقینەیە و لێدانە لەچاکسازی.

لەکوردستاندا؛ چاکسازی ئەوەندەی بابەتێکی ئیعلامیە ئەوەندە پرسێکی ستراتیژی و پیشەیی و کردەیی نیە، بۆئەوەی چاکسازی لەبابەتێکی ئیعلامیەوە بکەینە پرسێکی ستراتیژی و کردەیی؛  پێویستە تەواوی سێکتەرەکان بگرێتەوە و ڕێکخستنی ئەولەویەتی سێکتەرەکان دیاری بکرێت و میکانیزمی جێبەجێکردنیش بزانرێت.

کەرتی دارایی و بانک، ئەم کەرتە شادەماری بەهێزی گەشە و بنیاتنانی ئابوریەکی بەهێزی هەر وڵاتێکە، میکانیزمی دامەزراندن و بەهێزی ئەم کەرتە وەبەرهێنانی ناڕاستەوخۆی بیانیە (بەستنی کۆنفرانس).

زیادکردن و ڕێکخستنی باج (باج لەبەرهەم، باج لەداهات، باج لەهاوردەکردن)

وەبەرهێنان، بنەڕەتی گەشەی ئابوری هەر وڵاتێک بەندە بە ئاستی ڕێژەی وەبەرهێنانی ڕاستەوخۆی بیانی، زامنی پرەنسیپی پاراستنی ئاسایشی نیشتیمانیە، (کۆنفرانس).

کەرتی پەروەردە، سیستەمی پەروەردە بەشێوەیەک دابڕێژرێت کە مرۆڤی نایاب بەرهەمبێنێ (مرۆڤی هێمن و لەسەرخۆ، مرۆڤی دەرون ئارام، ڕاستگۆ، ژینگەپارێز، مرۆڤی بەویژدان، مرۆڤی پڕ پڕ لە خۆشەویستی، نەرم ونیان، بەرهەمهێن، داهێنەر، ئازاد، مرۆڤی ژیر و هۆشمەند...).

کەرتی تەندروستی، سیستەمی تەندروستی بەشێوەیەک دابڕیژرێت، کە (کوالێتی، خۆپارێزی، وەرزش، خۆراکی تەندروست) بنەماکەی بێت، دور لە بەکارهێنانی هەموو دەرمانە نا پێویست و ناجۆرەکان.

خوێندنی باڵا، پێویستە خوێندنی باڵا ستراتیژی خۆی لەسەر بنەمای نیشتمانی و خواستی بازاڕ دابڕێژێت، کە ڕۆڵەکەی لە ناوەندێکی دابەشکردنی کاغەزێک بەناوی بڕوانامە بگۆڕێت بۆ ناوەندێکی پیشەیی بون و پسپۆڕی.

348 جار خوێندراوەتەوە