هەڵگەڕانەوەی گروپە چەکدارییە وەکیلەکان لە سپۆنسەرەکانیان، وەک ئەگەرێک، ناتوانرێ رەتبکرێتەوە! گۆڕانکاریی بەرچاو لە هاوسەنگی هێز لە ناوچەکەدا، گۆڕانکاریی لە ئەولەوییەتی ستراتیژیی وڵاتانی سپۆنسەری هێزە وەکیلەکان، و گۆڕانکاریی لە داینامیکی سەرکردایەتی ناوخۆیی ئەو گروپانە، دەتوانێ ئەو ئەگەرە بەهێز بکات. هێزە وەکیلەکان (پڕۆکسیەکان)، لەڕووی ئایدۆلۆژیی و ستراتیژەوە، کۆکن لەگەڵ خاوەن، یان وڵاتانی پاڵپشتیکارییان. چەک، راهێنان و پارە لەوان وەردەگرن. بەردەوامی ئەو هاوکارییانەش، پێویستی بە بەردەوامی جەنگ و ناکۆکی ئیقلیمی و نێودەوڵەتی هەیە.
ئاشتی و سەقامگیریی ناوچەکە، بە پلەی یەکەم؛ هەڕەشەیە بۆ سەر بەرژوەندی ئەو گروپ و میلیشیایانە. بۆیە چاودێران، نزیکبوونەوەی (عەرەب-ئیسرائیل)، وەک یەکێک لە ئەگەرەکانی پشت جەنگی (حەماس) لە دژی ئیسرائیل لێکدەدەنەوە.
ئاڵۆزییەکانی ناوچەکە، شەڕی زلهێزەکان لەسەر خاک و سەرچاوە و نفوز لە ناوچەی رۆژهەڵاتی ناوەڕاستدا، میکانیزم و فاکتەری گرنگن بۆ مانەوەی پەیوەندی نێوان گروپە میلیشیاییە وەکلیلەکان و خاوەنەکانیان، وەک پەیوەندی نێوان (ئێران و وەکلیکەکانی لە عێراق، سوریا، لوبنان، فەلەستین و یەمەن.
ئەنجام؛ شەڕەکان و پێکدادانی هەرێمایەتی و نێودەوڵەتی، زیاتر پێگە و پێداویستی ئەم گروپە نادەوڵەتیانە بەهێز دەکەن، ئەوان کەرەستەی ئامادەن بۆ بەڕێوەبردنی ئەم شەڕە نێودەوڵەتیە. مانەوەی ئەو گروپانە پەیوەستە بە شەڕەوە نەک بە ئاشتی. بۆ کۆتایی هاتن بە رۆڵی گروپەکان، یان دەبێ هاوکێشەی هێز لە ناوچەکەدا گۆڕانکاریی بەسەردا بێت کە بەشێک لەوڵاتانی پاڵپشتیکاریی شەڕی بەوەکالەت تا ئەندازەی خۆبەدەستەوەدان لاواز بکات، یان دەبێ ئاشتیەکی دێژخایەن لەسەر بنەمای لێکتێگەیشتنی دیپلۆماسی، سەربازی و ئابووری نێوان زلهێزەکان لەناوچەکەدا بێتە ئاراوە، کە ئاراستەی بەرژەوەندی وڵاتانی خاوەن پڕۆکسی لە جەنگەوە بگۆڕێ بۆ سەقامگیریی.
ئەوەی ئێستا دەگوزەرێ، داینامیکێکە دەوڵەت و هێزە نادەوڵەتیەکان ئاراستەی دەکەن. لەرووکەشدا، یەکڕیزیی و یەک گوتار و ئایدۆلۆژیای یەکگرتوو لە هەردوو بەرەکەدا دەبینرێ، بەڵام لەناوەڕۆکدا بەرژەوەندی تاکەکەسی و ستراتیژی فەردی هەیە، ئەمەش پێمان دەڵێ؛ ناوچەکە لەبەردەم قۆناغێکی کراوەی ململانێدایە، مەرج نیە کۆتایی هەبێ!
227 جار خوێندراوەتەوە