لەرووی سەرچاوەكانی هێزەوە، گەورەترین هێز لەبەردەستی كورد دایە، كورد لەمێژووی نوێدا هێندە چەكدارەی نەبووەو ئەو جۆرە چەكانەی لە بەردەست دانەبووە، لەهەموو ئەوانەش گرنگتر پێگەی جیۆستراتیژی كوردستان، لەو ململانێێە سەختەی لەسەر سەپاندنی هەژموونی و داڕشتنەوەی سیستەمی جیهانیدا دەگوزەرێت، رۆڵێكی ئێجگار گرنگ و یەكلاییكەرەوە دەبینێت، ئەگەر بێتوو بە شێوەیەك باش سوودی لێوەربگیرێت، ئەمە جگە لەسەرچاوەكانی تری هێزی ئابووری وسیاسی ومێژوویی وكۆمەڵایەتی و....هتد
 كەچی سەرباری ئەو هەموو هێزە، دۆخی كوردستان لە هەستیارترین و مەترسیدارترین قۆناغی خۆ دایە، ئەو هێزە گەورانەی چەكداریان هەیە، وەك پەكەكەو پارتی و یەكێتی، شیرو تیر لەیەك دەسوون، نێوان پارتی و پەكەكە، بە هەمان شێوە پارت ویەكێتی رۆژ بەرۆژ گرژتر دەبێت، ئەو گرژییە مەترسی زۆر گەورەی  لێدەكرێت، تەقینەوەو شەڕی چەكداری لێبكەوێتەوە، هەرچەندە زۆر كەس پێی وایە بەرژەوەندییە ئابوورییەكانی ئەو هێزانە، بە تایبەتیش بەرژەوەەندی ئەو دوو بنەماڵەیەی پارتی ویەكێتی بەڕێوە دەبەن، دەرفەتی دایسانی شەڕی ناوەخۆ زۆر كەم دەكاتەوە، بەڵام راستی بابەتەكە ئەوەیە، كە گەمەیەكی هەرێمی وجیهانی زۆر مەترسیدار لە ژوورە تاریكەكاندا دەگوزەرێت، كە بەگەرمی كار بۆ دایساندنی شەڕێكی لەو جۆرە، واتە دایساندنی جەولەیەكی تری شەڕ ناوەخۆ دەكات، گومانی تیا نییە هەر تەقەیەك لە هەرێم بكرێت، دوا فیشەك و دوا تەقە دەبێت لە هەرێمێكی نیمچە سەرەبەخۆدا بیتەقێنن، لەبەرئەوەی ئەو دۆخە هەرێم وجیهانییەی ئێستا لە ئارادایە، زۆر جیاوازە لە دۆخی ساڵان نەوەكان ونابێت چاوەڕوانی ئەوە بن، واشنتۆن وپاریس بكەوێتە نێوانیان و ناوبژیوانیان بكات، بەڵكو دەبێت چاوەڕوانی ئەوەبن، كە هێزەكانی ئێراق بەناوی سەپاندنی سەقامگیری وگەڕاندنەوەی شەرعیەت، پەلاماری هەرێم بدەنەوەو حكومەتی ناوەند بەهێز بكەنەوە، ئەمەش رەنگ بێت یەكێك بێت لەو ستراتیژیانەی بەگەرم كاری لەسەر دەكرێت، لەكاتێكدا ئاشكرایە دوای داخستنی دەرگا پەرلەمان، دەسەڵاتی سیاسی كوردی هیچ شەرعیەتێكی نەماوە دەست پێوە بگرێت، مەسەلەی جێگیربوونی هەرێمیش لە دەستووری ئێراق، بۆ ماوەیەك ئێراقیش پشتگیری لێدەكات ودواتر دەستوور هەموار دەكەنەوە! دیارە ئەوانەی پێشیان دەڵێن دۆستەكانی كورد لەهێزە رۆژئاواییەكان، ئەوانیش بە بیانووی ئەوەی هەموو هەوڵێكیان دا لەگەڵیان بۆئەوەی هێز پێشمەرگە یەكخەنەوە وبەلایەنی كەم وەك رێگەیەك بۆ خۆ دوورخستنەوە لەشەڕ ناوەخۆ بەكاربێنن، كەچی لەجیاتی ئەوە ئەوان رۆژ بە رۆژ ئەو هێزە زیاتر لێكدەترازێنن، بۆیە لەدواجاردا ئەوانیش  لەگەڵ داخستنەوەی پەردە شانۆی ئەو هەرێمە، لەگەڵ هێزە هەرێمییەكانی تر وەك سوریاو توركیاو ئێراق وئێران چەپڵە لێبدەن وبەرژەوەندییەكانی خۆیان دەپارێزن، كە لەبنەڕەتدا خۆشیان لە دواوە بەشێك زۆری یاریزانەكانی سەر تەختەی شەترەنجەكە دەجوولێنن!؟

شاراوە نییە، كە سیستەمی سیاسی جیهانی وكۆمەڵگەی مرۆڤایەتی، لە هەموو رووێكەوە بە هەستیارترین دۆخی خۆیدا تێپەڕ دەبێت، سەرەتای مەشقكردن لەسەر هەنگاوەكانی خۆپارێزی، لەكاتی دایسانی شەڕێكی گەورە، بەئاشكراو بە نهێنی لە زۆر وڵاتاندا دەستیپێكردووە، كەچی تاوەكو ئێستا مییلەتی ئێمە، بەدەست كێشەكانی نێوان ئەو دوو بنەماڵە سیاسییە دەناڵێنێت، هەرگیز ناكرێت گرەو لەسەر بەرژەوەندی ولایەنی ئابووری پارتی ویەكێتی بكرێت، بۆ دوورخستنەوەی ئەگەرەكانی شەڕی ناوەخۆ، لەبەرئەوەی ئەمجارەیان دۆخەكە هێندە ترسناكە، ئەوان تەنیا لەخەمی رزگاركردنی سەری خۆیان دەبن نەك گیرفانیان، داگیركەرانیش وەك هەمیشە سەریان دەپارێزن وگیرفنیشیان خاڵی دەكەن، كەواتە ئەگەر دۆخەكە بتەقێتەوە، مەسەلەی كوردو خەباتی نەتەوەیی و ئەو جۆرە دروشمە گەورانە باویان نامێنێت وبەكۆتا دێن، شەڕ دەبێتە شەڕی رزگاركردن سەری خۆیان و تێكشاندنی خەونی كورد، كە بەمانەوەی سەری ئەوان سەودای پێدەكرێت، بۆیە ئەگەر هەر جەولەیەك تری شەڕی ناوەخۆ، لەپەنای هەر بیانووێكدا دەست پێبكات، كە ئێستا هەنگاوەكانی زەمینەبۆخۆشكردنی دەستیپێكردووە، دوا فیشەكی بەكۆتاهێنانی قۆناغێك وسەرەتای دەستپێكردنی قۆناغێك تر دەبێت، كە كورد تیایدا زۆر دەرفەتی گەورە لەدەست دەدات ودوای ئەوەش دەبێت چاوەڕوانی زۆر كارەساتی گەورە بكات!.