ئاگربەستى نێوان ئێران و ئیسرائیل چوە بوارى جێبەجێکردنەوە، بەیانى ئەمڕۆش ئێران چەند هێرشێکى موشەکیی بۆسەر ئیسرائیل ئەنجامدا و ترەمپیش دەڵێت:"تکایە مەیشکێنن".

هەواڵ:KNNC

دەستەى پەخشى ئیسرائیل رایگەیاند: ئەو ئاگربەستەى لەنێوان ئێران و ئێسرائیل دۆناڵد ترەمپى سەرۆکى ئەمەریکا بڕیارى لەسەردا، چوە بوارى جێبەجێکردنەوە.

لەبارەى ئاگربەستەکەوە، کەناڵى فەرمیی ئێران رایگەیاند کە "دوژمن ناچار بوە ئاگربەست قبوڵ بکات".


کاتژمێر و نیوێک پێش راگەیاندنى ئاگربەست، ئێران شەش موشەکى بە ئاڕاستەى ئیسرائیل هەڵداوە و زەنگى ئاگادارکردنەوە لە ئیسرائیل لێدراوە و سیستمى بەرگرى ئیسرائیلیش چالاک کراوە.

لەبارەى ئاگربەستەکەوە، عەباس عێراقچى، وەزیرى دەرەوەى ئێران لە تۆڕى کۆمەڵایەتیی ئێکس نوسیویەتى:"لەم ساتەدا هیچ رێککەوتنێکى فەرمیی بۆ ئاگربەست و کۆتاییهاتن بە ئۆپەراسیۆنە سەربازییەکان نییە".

دواى 12 رۆژ لە شەڕ، ئەم ئاگربەستە لەلایەن دۆناڵد ترەمپى سەرۆکى ئەمەریکاوە راگەیەنرا، بەجۆرێک 12 کاتژمێرى سەرەتا ئێران و 12 کاتژمێرى دواتر ئیسرائیل جەنگ رادەگرن، لەدواى ئەو وادەیەوە شەڕى نێوانیان بەتەواوەتیی کۆتایی دێت.