ڕێکخەری گشتی! فریاد ڕەسە؟

دوای وتاری یەکەمینی ڕێکخەری گشتی بزوتنەوەی گۆڕان و داوای لێبوردن لەخەڵک و دەنگدەرانی، زەمینەیەکی گونجاو هاتۆتە ئاراوە بۆ سەرئاوکەوتنی کێشەکان و زەمینەسازی و هێوربونەوەکان کاری خۆیان بکەن.

داوای لێبوردنی ڕێکخەری بزوتنەوە ی گۆڕان تەواوکەری ئیستیقالەی خانەی ڕاپەڕاندن بوو، وەک جوانترین نەریتی حیزبایەتی و دەستاو دەستکردنی دەسەڵات و جوانترین و گونجاوترین و باشترینی سەلماندنەکانی ئەم بزوتنەوەیەیە کە وەک هێزێکی مەدەنی دەتوانێت وانە و دەرسی نیشتیمانپەروەری بە هێزە تەقلیدی و چەقبەستوەکان وحیزبە بنەماڵەییەکان بدات و زیاتر و زیاتر تەوژمی کوردایەتی و زیاتر قوڵکردنەوەی فەلسەفیانەی( حوکم و ئیدارە) لەهەرچ کایەیەکدا بێت بە یارو بە نەیارانی بڵێتەوە.

ئەم جۆرە لە دەستاودەستکردنی دەسەڵاتدا بەهەموو کەم و کوڕیەکەوە دەنگدەری گۆڕان و گۆڕانخوازان دەبێت پشتگیری بکەن.

 هاوکات، ڕێکخەری گشتی دەبێت تواناو کارامە و لێوەشاوەیی خۆی لە قۆناغەکانی داهاتویدا بەتایبەتی دوای هەڵبژاردنەکان (ئەنجامەکان هەرچیەک بێت) بسەلمێنێت.

ڕێکخستنەوەی ناو ماڵی بزوتنەوەی گۆڕان چوار پایەیە:

1- هەموو گروپ و کارەکتەر و تەکەتول بە کێشەکانیانەوە لەناو یەک ڕوئیاو ستراتیجی درێژخایەندا کۆبکاتەوە.

2- کەسایەتی خودی ڕێکخەر بەچاوی یەکسانی و تەبایی و خوشک و برایەتیەوە سەرکردایەتی کۆی پڕۆسەکە بکات و لەبەردەم مێژوی ئەم نەتەوەیەدا بڕیاری دابێت لەهەمومان ئازاتربێت لەبەرامبەر هەر پرسێکی ناوخۆیی یان دەرەکی بزوتنەوەکە.

٣-  گوتاری سیاسی قوڵ و گشتگیری بزوتنەوەی گۆڕان تاکە هێزە کەخاوەنی هەموو ئەو پاکێجانەبوەکە سیستەمی ئەم هەرێمەی لەسەر دادەڕێژرێتەوە و لەدەرەوەی ئەو پاکێجانەش بزوتنەوەی گۆڕان هیچ مانایەک نابەخشێت و سیستەمی سیاسی کوردستانیش بێ ئەو نەخشە ڕێگایە وەک ئێستایە کە هەیە.

4-ڕێکخەری گشتی، ڕێکخەر و ڕاوەستاوی جددی وگوێگرێکی جددی هەموان و برای گەورەی هەموان بێت.

دوربێت لە فیتنەچی و فەوضەوی ڕیاکەر و ڕۆحی ئینتیقامکردنەوە لەناو هەناوی بزوتنەوەکەدا بنبڕ بکات.