جارێکیان دیوەخانەکەی (ئەحمەد پاشای بابان) لە کاتی دەستبەسەری لە ئەستانبوڵ پڕ دەبێ لە میوان، عەبدوڵڵا پاشای برایشی لە کۆڕەکەدا ئامادە دەبێت.
کاتێک قاوەچییەکەی ئەحمەد پاشا قاوە دەگێڕێ و بە ناو میوانەکاندا دێت و دەچێ، هەموو جارێک عەبدوڵڵا پاشا تەماشای قاوەچییەکە دەکات و دەستیش بۆ دەمی خۆی دەبات. ئەمکارە چەند جارێک دووبارە دەبێتەوەو سەرنجی میوانەکان رادەکێشێت. پاش چۆڵبوونی دیوەخانەکە، ئەحمەد پاشا و عەبدوڵڵا پاشای برای دەمێننەوە. ئەحمەد پاشا ئەم پرسیارە لە عەبدوڵڵا پاشای برای دەکات: عەبە ئەوە بۆچی واتدەکرد؟
عەبدوڵڵا پاشا دەڵێ: زۆرم تینوو بوو مەبەستم بوو ئاوی خواردنەوەم بۆ بهێنێ. ئەحمەد پاشا دەپرسێ: ئەی بۆچی لە جیاتی ئەم ئاماژەدانە، راستەوخۆ داوای ئاوت نەدەکرد؟ عەبدوڵڵا پاشا دەڵێ: قوربان لە حزوری جەنابتدا شەرمم دەکرد لە ناو ئەم هەموو میوانەدا قسە بکەم!
ئەحمەد پاشا دەڵێ: عەبە! تا لە وڵاتی خۆمان بووین، حاکم بووم و دەسەڵاتم هەبوو، خەڵک رێزی لێدەگرتم، تۆ چووی لەشکری تورکت هێنایە سەرم، ئێستایش لێرە، کە بە کەساسی و دەستبەسەری کەوتووین، شەرم دەکەی لە حزوری مندا، داوای ئاو لە قاوەچییەکەم بکەی؟ بە خۆمت بگووتبایە ئەحەی......... هەڵسە ئاوم بۆ بێنە.
ئەم بەسەرهاتەو دەیانی دیکەی ناو مێژووی ئێمە، پێماندەڵێ: ئەگەر لە ناو ماڵەکەی خۆتدا رێز لە یەکدی نەگری، ئەگەر لە ناوەوەدا تەبا و یەکڕیز نەبی، ئەوا جوڵەکانی دەرەوەی ناو ماڵەکەت، بەهایەکی گەورەی نابێ و هێندەی روویەکی نمایشی وەردەگرێ، گوزارشت لە حەقیقەتێک ناکات.
رێزگرتن لە بەهاکانی دیموکراسی و مافی ئینسان، رەخساندنی دەرفەتی کاری سیاسی یەکسان و ژیانێکی دادپەروەرانەو رێزلێگیراو بۆ هەمووان، قوڵکردنەوەی پرینسیپەکانی هاوڵاتیبوون لە ناوەوە، دەتوانێ یەکڕیزی راستەقینە لە دەرەوە فەراهەم بکات، یەکڕیزی و بەهای سیاسی و ئەخلاقی و کۆمەڵایەتی ئەم یەکڕیزییە لە ناوەوە دەست پێدەکات، تا لە ناوەوە ئەمە دروست نەکرێ، هەر گەڕان و هەوڵدانێک بۆی لە دەرەوە، دەبێتە هەوڵ و گەڕانێکی نمایشیانە.
3855 جار خوێندراوەتەوە