حکومەتی هەرێمی کوردستان لە نوێترین بڕیاریدا لە دانیشتنی رێککەوتی (28/7/2021) بڕیاریدا هەردوو قەزای(زاخۆ و سۆران) بکاتە ئیدارەی سەربەخۆ هاوشێوەی هەردوو ئیدارەی گەرمیان و راپەرین کە پێشتر کرابوون بە ئیدارەى سەربەخۆ.

بەسەربەخۆ ئیدارەدانی قەزاو ناوچەکانی هەرێم لەلایەن حکومەتی هەرێمەوە کۆمەڵێک تێبینی یاسایی ورد هەڵدەگرێت و لەڕووی نفوزی سیاسی و دابەشکاری کێرفی حزبیەوە جگە لە تۆخکردنەوەی قەڵەمڕەوی پارتی و یەکێتی شتێکی تر نیەو ناوی بێ ناوەرۆکە و بارێکی قورس و زیادەیە لە پشتی سیستمی لامەرکەزی دەنرێت و مەبەست و مەغزای تری لەپشتە.

گرنگترین سەرنجە یاسایی و واقعیەکان بریتین لە:
یەکەم: دەستوری عێراقی هەمیشەیی ساڵی 2005 لە مادەی 116 بەدەق دیاریکردووە کە هەیکەلیەتی ئیداری سیستمی ئیتحادی لە کۆماری عێراق دابەش دەبێ بۆ  پایتەخت و  هەرێمەکان و پارێزگا لامەرکەزییەکان و یەکە ئیدارە خۆجێیەکان. حکومەتی هەرێم لەسەر چ بنەمایەکی دەستوری و یاسایی بەرگ بۆ ناوهێنان و بونیادی ئیدارەی سەربەخۆ دەدۆزێتەوە؟؟
.بۆیە ئیدارەی سەربەخۆ تەواو رەهەندی نادەستوری هەیە لەسەر ئاستی عێراق و بەو پێیەبێت حکومەتی بەغداد هەروەک چۆن تائێستا ئامادەنیە مامەڵە لەگەڵ بە پارێزگابوونی هەڵەبجە بکات کە بنەمای یاساییشی هەیە نەخاسمە مامەڵە لەگەڵ ئیدارەی سەربەخۆبکات؟!.

دووەم: ئیدارەی سەربەخۆ لەدەرەوەی میکانیزمی پێکهێنانی یەکەئیدارییەکانە لەناو یاسای ژمارە 3ی ساڵی 2009ی پارێزگاکانی هەرێم، چونکە یاسای ناوبراو یەکەی کارگێڕی حەسرکردووە بە(پارێزگا، قەزا، ناحیە).

سێیەم: لەرووی واقعیەوە پارێزگارو بەرپرسی یەکە کارگێڕییەکانی ئەو ناوچانەی دەکرێنە ئیدارەی سەربەخۆ لە پرسی تەمویل و پارەدرکردن و پێدانی دەسەڵاتەوە تووشی ئالیشە دەبنەوە، بەنموونە پرسی پترۆدۆلار و دیاریکردنی پشکی ئەو یەکە ئیدارییانە جگە لە بەش بەشێنەی حزبی پێوەری تری بۆ نامێنێتەوە لەسەر ئاستی سەروو خۆیان کە پێشتر هەیانبووە.

چوارەم: ئەزموونی رابردووی بە سەربەخۆکردنی ئیدارەکانی راپەرین و گەرمیان سەلماندویەتی ئەو بابەتە لەبەر خاتری سیستمی لامەرکەزی نەکراوەو دۆخی ئەو ناوچانەی بەرەو باشبوون نەبردووە لەڕووی خزمەتگوزارییەوەو دانیشتوانەکەی سوودمەندنەبوون و تەنانەت بە پارێزگابوونی قەزایەکی وەک هەڵەبجەش ناوی بێ ناوەرۆک بووە.

روئیای بزوتنەوەی گۆڕان بەوجۆرەیە لەبری راگەیاندنی سەربەخۆی ئیدارەکان دەسەڵاتی دارایی و کارگێڕی زیاتر بە یاسا بدرێتە پارێزگاو قەزاو ناحیەکان و بە دادپەوەری و دوور لە ستەمی جوگرافی لە ئەنجومەنی وەزیرانەوە مامەڵەیان لەگەڵ بکرێت.