٢٥-٧ ڕوداوێکی مێژووی بوو.. ڕەوانشاد نەوشیروان موستەفا، کەسێک بوو بە پێشەنگی کە هەندێک لە هاوڕێکانی بەر لە نەیارەکانی، بە کەسێکی شەڕخواز و توندوتیژ ناویان دەهێنا، کەچی بزوتنەوەیەکی مەدەنی بێ چەکی خستە سەرپێ و یەکەم ئەزموونی ئۆپزسێۆنی ڕاستەقینەی لە پەرلەماندا دروستکرد.

خەونی هەزاران کوردی بە دنیایەکی باشترەوە کۆکردەوە و کردی بە هێزێکی ڕاستەقینە بۆ ئەوەی فشارێکی مەدەنی و دیموکراسیانە لەسەر ئەزموونێکی سیاسی دروست بکات کە کونجێکی نەمابوو پڕ کێشە و قەیران نەبێت..

خەون و ئومێدی گۆرانکاری زیندوو کردەوە، لانیکەم ئەوەی بۆ خەڵک سەلماند گەر کۆببنەوە و لەسەر بەرنامەیک ڕێک بکەون و دەنگیان یەک بخەن، دەتوانن کاری گەورە بکەن.

٢٥-٧ ئەو ڕۆژەیە کە خەڵک خۆیان وەک هێزێکی راستەقینە ناسیەوە کە بێ ئەوەی پێویستیان بە چەک و توندوتیژی هەبێت، دەتوانن بە قسە و هەڵوێست و ئیرادەیەکی خۆڕاگرەوە کاری گەورە بکەن. نەیارەکانیشی هەر لەم خاڵەی ترسا بوون بۆیە لەوکاتەوە تا ئێستا بە ڕێگە و شێوەی جیاواز کار بۆ ئەوە دەکەن لەبەرچاوی خەڵکی بخەن و وەک بزوتنەوەیەکی بێ کەڵک وێنای بکەن، وخەڵک لە دروستکردنی گۆڕانکاری نائومێد بکەن.

٢٥-٧ رۆژی دروستبوونی ئیرادەی خەڵکە کاتێک بڕیاردەدات بەدەنگی بەرز بەگژ خراپی و بێکەڵکی سیتسەمی حوکمرانی کوردستاندا بچێتەوە. هەر لەبەرئەوە ٢٥-٧ رۆژێک نیە لە دوامانەوە، بەڵکو روداوێکە بەردەوام ڕوودەدات و بە زیندووی دەمێنێتەوە.