نەوشیروان مستەفا سەرکردەی گۆڕانکارییەکان

1
مێژووی ڕزگاری نیشتیمانی گەلانی دنیا، پڕە لەسەرکردەی بەهیمەت و ئازاو بەجەرگ و خوێندەوار و سیاسی خاوەن فکرو قەڵەم، لەکاتێکدا لە مێژووی بزاڤی ڕزگاریخوازی گەلەکەماندا، تەنیا ناوی چەند سەرکردەیەک دیارن، ئێمەش مێژوو و کاروچالاکیەکانی ئەوسەکردانە دەخوێنینەوە تاکو سود لەتواناکانیان وەربگرین.

بەتایبەتی لە مێژووی شۆڕشی نوێی گەلەکەماندا، وەکو گەلێکی ژێردەستە و زوڵملێکراو و نیشتیمانێکی پارچەپارچەکراو، ئێمەش سەرکردەیەکمان (نەوشیروانێکمان) هەیە کە پێویستە هەڵوێستەی لەسەر بکەین و دووبارە و چەندبارە، لەسەر ئەزموونەکانی  بخوێنینەوە! هەڵوێستەی قووڵ لەسەر سیاسەتی ڕێکخراوەیی و گۆڕانکارییە فکریەکانی بکەین، کە هەرگیز ژەنگ و قێڵبەندی ئایدۆلۆجیاکان، نەیتوانیوە لەیەک چوارچێوەی  وشکهەڵاتوودا، بیرو فکر و کاری ڕێکخراوەیی خەباتەکەی بێکاریگەر و  بێ گیان بکەن.

ڕەوانشاد نەوشیروان موستەفا، لەساڵی ١٩٧٦ وە تا کاتی چاولێکنانی و ماڵئاوایی لەگردی زەرەگەتە، هەردەم کاری لەسەر گۆڕانکاریی دەکرد. ئەو هەڵوێست و توانای ڕێکخراوەیی و هزری حیزبی خۆی، بەپێى کات و سیاسەت و دەسەڵاتی دووژمنکارانەی داگیرکەران دەگۆڕیی.

لەکاتێكدا سیاسەت و هاوسەنگی ‌‌هێزە ئیقلیمی و نێودەوڵەتیەکان گۆڕانکاری بەسەرادەهات، بە وردەکاریەکی زۆرەوە  کارە ڕێکخراوەیی و سەربازی و فکریەکانی لە کۆڕی خەباتدا دەگۆڕیی، تاکو گەیاندی بەسەرکەوتنی ڕاپەڕین و ڕاماڵینی دەسەڵاتی حزبی بەعسی داگیرکەر لە هەرێم.

دواتر دوای دامەزراندنی حکومەتی هەرێمی کوردستان و کاتێک حکومەتی هەرێـم لە دۆخێکی چەقبەستوودا بوو، میللەتەکەمان لەناو بازنەی حوکمڕانە گەنەدەڵەکاندا دەخولایەوە، توانایەکی دیاری هەبوو لەدەست نیشانکردنی ئاستەنگەکان وبەربەستەکان. لەهەمانکاتیشدا نەخشە و پلانی گۆڕا‌نکاریی ئاشتیخوزانەی هەبوو، بۆ سیستمی حوکمڕانی و بۆ چارە سەرکردنی  ئالیشە وئاڵەنگاریەکان و کردنەوەی گرێکوێرەکان ودەرچوونی کورد لەو میحنەتەی تێی کەوتبوو.

ئەی سەرکردە تاقانەکەم، لەژیانتدا خۆت تەسلیمی کۆنەپەرست و هەلپەرست و پەلەپەلکەرە ناواقیعیەکانی سیاسەت نەکرد.

2
ئەوان دەیانوویست بیروکردەوەی سرک و بزێوتان لەقاڵبێکدا قەتیس بکەن، بەڵام درەختی میژووی خەبات و تێکۆشانت هەمیشە بەجوانی مایەوە، ڕووی لەئاسۆی گەش  وگۆڕانکاری بوو.

هەربۆیە ئەو رۆژەی هەواڵی کۆچی دواییت بڵاوبۆوە، فرمێسکی لە چاوی هەموو ئەو کەسانە هێنا کە خەونیان بە ژیانێکی دادپەروەرانە و باشترە وە دەبینی.

هەموان وەک سیاسیەکی دڵشکاو تۆیان دەبینی کە ساڵانێکی زۆربوو هاوارت بۆ ئەوە دەکرد، حوکمڕانیەکی رەشید و بەرپرس و دادپەروەرانە هەبێت، بەڵام نەک هەر گوێیان بۆت نەگرت، بەڵکو بۆ ئەوەی ئامانجەکانت نەیەنەدی، دەیان تۆمەتیان بۆ دروستکردیت  و پەلاماریان دایت. هەموو چین  وتوێژێک تۆی خۆش دەوویست.

-بێدەرەتانەکان خۆشیانوویستیت، چونکە بە دەنگی ئەوان قسەتدەکرد.

-هەژاران خۆشیانوویستیت، لەبەرئەوەی هەستیاندەکرد وەک ئەوان دەپۆشێ و دەژی.

-خوێندەواران خۆشیانوویستیت، هەستیاندەکرد بە چەندین فرسەخ و شاقاو لەو لێشاوە سیاسیە نەخوێندەوارانەی بە پلەی بەرزگەیشتوون، دووریت و تۆ خوێندەوار و تێگەیشتوو و بیرکەرەوەبوویت.

-گەنجانێکی زۆر خۆشیانوویستیت و لە دوا ویستگەی ژیانتدا کە (بزووتنەوەی گۆڕان)ت دروست کرد و تائێستاش بەحەماسەوە ئاڵا نیلی و مۆمەکەت بەرزدەکەنەوە، چونکە هەستیاندەکرد و هەستدەکەن، تۆ بەو تەمەنەوە لەوان لەهەموو کەسێکیتر نزیکتریت.

تۆ پیرێکی هاوڕێی گەنجان، سیاسیەکی هاوڕێی خوێندەواران، راستگۆیەکی نزیک لە جوتیاران و هەژاران و کاسبکاران  بوویت.

دەزانێت ئەو رۆژەی کۆچی دوایت کرد و هەموو ساڵ لەویادە بەئازارەدا، هەموو ئەو چاوانە دەگرین کەبەردەوام تۆ وەک ئومێدێکی گەورە بۆ گۆڕانکاری و باشترکردنی حوکمڕانی دەبیین، تۆ خۆشەویستیت؛ چونکە هەرگیز لە ژیانتدا بۆ یەکجاریش ئەو هەموو ساڵانەی خەباتی پڕچەرمەسەریی و ماندووبوونت بەکەس نەفرۆشتەوە و بۆ یەکجاریش بە هیچ ساتەوەختێکی ژیانتەوە نەنازیت!


3
هەمیشە هەستماندەکرد بیری تۆ لای ئایندەیە، بیرت لای ئەوەبوو سبەی چی بۆ خەڵک بکەیت؟ لەبیرمانە کە بەزمانی خۆت دەتگووت، بۆ نەوەی ئێستا چ گرنگە لە شاخ و شۆڕش و ڕابردوودا چیمان کردووە و نەکردووە؟ بۆ ئەوان ئەوە گرنگە ئێستا و سبەی چی دەکەین!

هەرگیز ژیانی سیاسیت وەک هەموو سیاستەمەدارێکی مەزنی جیهان بێئاستەنگ و کۆسپ و مەترسی  نەبووە، بەڵام ئێمە خۆشماندەوێیت، لەبەرئەوەی تا دواساتی ژیانت هەوڵتدەدا شتەکان چاک بکەیتەوە و بیانخەیتەوە سەر ڕێگای ڕاستی خۆشگوزەرانی میللەتەکەمان...

سەرکردەکەم تۆ ئومێدی بێ ئومێدەکانی و دەنگی بێدەنگ کراوەکانیت، تۆ خەڵکێکی زۆرت پەروەرەدەکرد لەسەر ئەوەی قسە بکەن و بەدەنگی بەرز بۆچونەکانی خۆیان بڵێن.

لێڕەوە پێت دەڵێین: وەک خۆت دەتگووت، ئەم ڕێبازە سەختە و هەمووکەس بەرگەی ناگرێت، بەڵام تاکو یەک کەس مابێت و ئاڵایەکی نیلی هەڵبگرێت، ئەوا ئەم خەباتە بەردەوام دەبێت و خەونەکانی تۆ بۆ باشترکردنی سیستمی حوکمڕانی و لەناوبردنی گەندەڵی و بەرەوپێشخستنی دامەزراوەیی سەربەخۆیی حکومی و دامەزراندنی هێزی نیشتیمانی و نەهێشتنی دەستی حیزب لە ناوحکومەتدا دێنەدى و ئێمە ڕێبازەکەت ون ناکەین. هەزران سڵاو لەگیانی پاکت و ڕۆحت ئارام و ئاسودە بێت گەورەم، لەناو ئارامگەکەت ئارام بگرە، چونکە خەونی گۆڕانکاریی و دوا پڕۆژەی ژیانت (بزووتنەوەی گۆڕان) بەردەوامە و ئێوە سەرکردەی گەورەیی گۆڕانکارییەکانن.

246 جار خوێندراوەتەوە