شارەوانی سلێمانی، جوتیارانی گوندێکی ئاگادارکردوتەوە دەستبەرداری زەوییە کشتوکاڵییەکانیان ببن بۆئەوەی بەسەر فەرمانبەراندا دابەشبکرێت، جوتیارانیش دەڵێن: بژێوی ژیانیان لەسەر ئەو زەویانەیە و پرۆژەی کشتوکاڵی گەوریان لەسەر بونیاد ناوە.

هەواڵ:KNNC

بەیانی ئەمڕۆ، ژمارەیەک لە جوتیارانی گوندی (قایکەند) لەسنوری ناحیەی پیرەمەگرون-ـی سەربە پارێزگای سلێمانی گردبونەوە و لە کۆنگرەیەکی رۆژنامەوانیدا رایانگەیاند، لەلایەن سەرۆکایەتی شارەوانی سلێمانی و بەڕێوەبەرایەتی زەوی و زارەوە ئاگادار کراونەتەوە، دەستبەرداری زەوییە کشتوکاڵییەکانیان ببن بۆئەوەی بەسەر فەرمانبەراندا دابەشبکرێن.

جوتیاران رەتیدەکەنەوە دەستبەرداری زەوییەکانیان ببن و دەڵێن: گوندەکەیان زەوی و ئاوی باشی بۆ پرۆژەی کشتوکاڵی هەیە و چەندین خانوی پلاستیكییان لەسەر ئەو زەوییانە دروستکردوە و بەرهەمێکی زۆری کشتوکاڵییان هەیە، هەروەها بژێوی ژیانیان لەسەر ئەو پرۆژە کشتوکاڵییانەیە.

دەشڵێن: گوندەکەیان لەدەرەوەی ماستەرپلانی سلێمانییە و 30 بۆ 40 کیلۆمەتر لە شارەوە دورە. ناشزانن ئەگەر ئەو زەوییانەیەان لێوەربگیرێت قەرەبو دەکرێنەوە یان نا.

بە وتەی ئەو جوتیارانە، زەوییە کشتوکاڵییەکان کە شارەوانی سلێمانی داوای دەکات هەزار و 450 دۆنمە و لەلایەن 38 جوتیارەوە خاوەندارێتی دەکرێن و 100 کەس کار لەسەر ئەو زەوییانە دەکات.

قایکەند گوندێکە، کەوتوەتە ناحیەی پیرەمەگرون، سەر بە قەزای دوکان لە پارێزگای سلێمانی، لە باکور ھاوسنورە لەگەڵ گوندی حەسەن تەپەی خوارو و لە باشور لەگەڵ گوندی ئەڵایی خوارو و لە ڕۆژھەڵات لەگەڵ گوندی چەقژی خواروو و لە ڕۆژاوا لەگەڵ گوندی باخ.