کار و جوڵانەوە سیاسیەکان بریتین لە کۆمەڵێک بۆچون و ئاڕاستە و ئاکار و پێوەری پەیوەست بە تاک و پەیوەندی بە دەسەڵاتی سیاسیەوە .

جوڵانەوە سیاسیەکان، هۆکارێکی گرنگی یەکخستنی بیروباوەڕە وەک یەک یان نزیک لەیەکەکانە بۆ بەدیهێنانی ئامانجێکی رون و چەسپاندنی بەرنامە سیاسیەکان لەدەسەڵات، بەرێگای رەوا و دور لە بەکارهێنانی هەموو هۆکارەکان تەنها بۆ دەستگرتن بەسەردەسەڵاتدا.

بۆنەیەکی باشە لەبارەی شتێکەوە قسەبکەین، کە بۆتە گرفتێکی گەورە لەناو سیاسەتی جوڵانەوە سیاسیە کوردیەکاندا؛ ئەویش (قینی یان بوغزی) سیاسیە.

بونیادنان و بەکارهێنانی هێز و دەسەڵات لەسەر بنەمای دروستکردنی قین و بوغزی سیاسی، دەرەنجامێکی وێرانکەر و داڕماوی هەیە، هەمیشە چەکێکە بۆئەوەی خەڵکی پێ چەواشەبکرێت، نەیار و ململانێکارەکانی پێبشکێنی، بەڵام هەرگیز ئەو هێزەی لەسەر بنەمای پەرەپێدانی رق و قینە دروست ئەبێ و درێژە بەمانەوەی خۆی ئەدات، ناتوانێ تەمەنێکی درێژ و لەدۆخی ئاسایدا بگوزەرێ، رق و بوغزی سیاسی هەڵچونێکی کاتیە و هەمیشە ئەگەری هەڵگەڕانەوەی بەرووی دروستکەرەکانیدا هەیە.

لەجوڵانەوە سیاسیەکانی کوردا ململانێ حزبییەکان کەمی لەسەر رەخنەی عەقڵانیەت و جدیەت لەپرۆژەی بەدیل دامەزراوە، زۆربەی لەشەڕی یەکتر کوشتن و سڕینەوە و سەرکوتکردن دەستپێدەکات، تا شکاندن و تۆمەت و ژەهری رق رشتن، مێژووی نزیکی ناکۆکی هێزەکان دەرخەری ئەو راستییەن، کە هیچیان مۆدێلێکی ژیانی سیاسی نوێیان بونیاد نەناوە، بەڵکو بەردەوام کاریان لەسەرشکاندنی بەرامبەرەکانیانکردوە، ئەم نەهجە لەکار توانای گەشەپێدان و پێشخستنی سیاسی نابێت، خولانەوەیە لەبازنەی بەتاڵدا..

ئێستاش لە کوردستان تەوژمی چاندنی رق و بوغزی سیاسی لەهەموو کات زیاتر پەرەی پێدەرێت، هەندێک لە هێزە سیاسیەکان دونیابینی سیاسیان تادێ بچوکتر دەبێتەوە، مەیدانی شەڕەجنێو و تۆمەت و قسەی بێبەها فراوانتر دەکەن، بەبڕوای من ئەوە دەلیلی شکستی حەتمی هێزەکانە.

هێزی سیاسی راستەقینەی خەڵک، جگە لەکارکردن بۆ هێنانەدی ئامانجە رونەکانی؛ ئاوڕ لەهاشوهوش ناداتەوە و نابێت بکەوێتە ژێرکاریگەری ئەو ریتمە سوکەی پشت ئەبەستێت بەدرۆ و شکاندن ئەوەی پێی ئەوترێ میدیای (سێبەری گروپ و دەستە حزبیەکان) کە بەداخەوە بەپارە و بودجەی زەبەلاح ئاڕاستە ئەکرێ.

ئەوەی ئێستا روودەدات لەهێرشی ناڕەوا و بەرنامە بۆکێشراو بۆ لێدان لەهەموو ئەورێگایانەی بزوتنەوەی گۆڕان ئەیگرێتەبەر، نابێ گۆڕان ناچار بەگرتنەبەری هەمان رێگا بکات، بەڵکو ئەبێ گۆڕان زۆر بەجدی بگەڕێتەوە سەر بنەماکانی و کارکردن بۆ هێنانەدی دادی کۆمەڵایەتی و خزمەتکردنی خەڵکی کوردستان.

دوو ساڵی رابردوو، بەنەخشە و بە پارەی زۆر کاردەکرێت بۆلێدان لەم بزوتنەوەیەی کە هەڵقوڵاوی خواست ویستی خەڵکە، بەڵام کاریگەری ئەم رقە سیاسیەی دژ بەگۆڕان گیراوەتەبەر تادێت کاڵ ئەبێتەوە و بێگومان لەهەلومەرجی جێبەجێکردنی ئەو بەرنامە چاکسازی وسیاسەی کە بزوتنەوەی گۆڕان، هەنگاو بۆ جێبەجێکردنی دەنێت ئاسەواری ئەو رقە ئاراستەکراوە بەتەواوی کۆتایی دێت .

خەڵکی کوردستان ،بەشێوەیەکی گشتی باجی رقی سەرۆک و حزب سەرکردەکانی ئەدەن ،رقی یەکتر شکاندن و پەنابردن بۆهەموو هۆکارەکان، رقێک تا رادەی یەکترسرینەوە، رقێک گەیشتۆتە ئاستی شێواندنی ئاشتی کۆمەڵایەتی و سیاسی ، هەموو ئەمانەش بۆتە هۆی داتەپینی ئابوری هەرێمی کوردستان و پەراوێزخستنی سەروەری یاسا، بەشی زۆری کێشانی ئەم تابلۆیە دەرەنجامی ئەو رق وبوغزە سیاسییە کە هێزە رکەبەرەکان نەخشاندویانە.

دوای تێپەربونی زیاتر لەدەیەیەک لەسەرهەڵدانی بزوتنەوەی گۆڕان وەک چۆن زۆر پرەنسیپی ژیانی حزبی و سیاسی لەکوردستان گۆڕی دەشبێت لەم بوارەدا دەسپشخەربێت، سیاسەت دابماڵێ لەرق و قینە لەناوخۆ و لەدەرەوەی خۆیدا، بەم دواییانە هەوڵەکانی ئەم بزوتنەوەیە جێگەی تێرامانە کە دەبینرێت هەوڵی جدی ئەدات بۆ نزیک بونەوە لەهێزە سیاسیەکانی کوردستان، لێک نزیکردنەوەی هێزە ناکۆکەکانیش ،لەدیدی گشتیدا ئەم سیاسەتە زیانی لەئاستی جەماوەری بزوتنەوەکەداوە، بەڵام سەرەنجام بۆ خێری گشتی خەڵکە و راکێشانەوەی دەستی ئەوهێزانەیە کەئامادەبون بۆ مەرامە حزبیەکانی خۆیان کۆی ژیانی گشتی بشێوێنن، کارکردنی کاربەدەستەکانی گۆڕان لەدامەزراوە دەوڵەتیەکانیش وەک دەبینرێ بەگیانی دور لەحزبایەتی شتێکی ئەزمون نەکراوە لەکوردستان و بەدڵنیایش کاریگەری گەورەیی هەیە لەگۆرینی سیستەمی بەرێوەبردن.

گۆڕان،هێزێکی جەماوەری بەرفرانە لەمەیدانی سیاسیدا و رۆڵی گرنگ و گەورەی گێراوە ،لانیکەم شەری چەکداری گۆڕی بە گفتوگۆی سیاسی، جنێوی گۆڕی بەرەخنە، تۆمەتی گۆڕی بەپرۆژە، پشتبەستن بە هێزی دەرەکیکرد بەشەرم و شورەیی، ئەبێ رێبازە سیاسیە نیشتیمانیەکەی لەژێر کاریگەری رقی هیچ هێزو لایەنێکدا نەگەرێتەدواوە.