وەک چۆن مرۆڤ بە ژەهراوى بونى گەدەى ناتوانێت خواردن و خواردنەوە لەناو سکی-دا رابگرێت، بەهەمان شێوە لەسەردەمى کۆرۆناشدا مرۆڤ توشى ژەهراوى بونى عەقڵ بوە، بەم ژهراوى بونەش مرۆڤ ناتوانێت پارێزگارى لەو هیواو ئومێد و چیرۆکانە بکات کە لە ژیاندا بە زیندویی دەیانهێڵێتەوە، بۆیە دەبینى خەڵک بەردەوام چیرۆکەکانى مەرگ و ترس دوبارە دەکەنەوە، لەگەڵ زۆربونى ئەم چیرۆکانەش هیوا کۆچ دەکات و ئومێد سەرى خۆى هەڵدەگرێت.

 

تۆقینى مرۆڤە لەو مەرگەى ئێستا بەهۆى کۆرۆناوە لێى نزیکە، بەڵام مردن بە برسێتى ساڵانە نۆ ملیۆن کەس لەناو دەبات، لە کاتێکدا برسێتى دەرمانێکى ناسراوى هەیە و لەبەردەستى هەمو دەوڵەت و دەزگا خێر خوازیەکانیشدایە.

 

دەرمانى برسێتى، شۆردنى هەردو دەستەکانە رۆژانە، بەڵام مەبەستم لە شۆردنى دەست، شۆردنى بە ئاو و سابون نیە، بەڵکو مەبەستم شۆردنیەتى لە گەندەڵى، کە ئەم گەندەڵیە پیسە، هۆکارى یەکەمى مردنە بە برسێتى و هەندێ جاریش دەبێتە هۆکارى مردن بە نەخۆشییە ئاساییەکانیش، چونکە بودجەکانى تەرخانکراو بۆ تەندروستى بە ئاشکرا دەدزرێن یاخود رەوانەى بوارى دیکە دەکرێن.

 

دەرمانى برسێتى بریتیە لە دابەشکردنێکى دادپەروەرانەى سامان و کارو خزمەتگوزارى، گرنگى ئەمەش لە رۆژانى کارەساتە سروشتیەکان و تێکچونى بارودۆخى وڵات و بڵاوبونەوەى نەخۆشی دەردەکەوێت، وەک حاڵى ئێستامان، بەڵام دواتریش لێمان ون دەبێت.

 

بۆنمونە هەڵسوکەوتى میسریەکان لە (18) رۆژى شۆڕشەکانى یەنایەرى کانونى دوەمى  )2011(لە جوانترین شێوەى دا بو، بەڵام پاشتر هەمو ئەو خۆشەویستى و بەدەم یەکەوە بون و بەزەییە لەبەرچاو ون بو، بەڵکو بۆهەمیشە رۆشت و نەما.

 

کەواتە ئایا دەوڵەت و دامودەزگاکان بیریان لەوە کردوەتەوە خەڵک تەنانەت لە وڵاتانى پێشکەوتوش لەوانەیە لە برسێتى زیاتر بترسن وەک لە ڤایرۆس؟

بە هەزاران کەس لە دەوروبەرى ئێمە بەبرسێتى دەمرن و ئێمەش هەستیان پێناکەین، لەکاتێکدا برسێتى دەرمانى هەیە! برسێتى دەرمانێکى هەیە ناوى دادپەروەرى و بەزەیی و دەستپاکییە، ئەو دەستپاکیەى ئێستە بوەتە بنێشتە خۆشەى سەر زارى هەمو کەس و بەیانى و ئێوارە لەگەڵ باسکردن لە کۆرۆنا باسى دەستشۆردن و پاک راگرتنى هەرد و دەستەکانمان دەکرێت.

 

"پاکو خاوێنى هەرد و دەست" پێویستە بە قوڵى بیر لە مانا جیاوازەکانى ئەم دەستە واژەیە بکەینەوە، بەشێوەیەک پاک و خاوێنى دەست ببێت بە بابەتى کۆمەڵگاکانمان نەک تەنها لەسەردەمى کۆرۆنا بەڵکو دواى ئەویش، چونکە ڤایرۆسى گەندەڵى زۆر کوشەندە ترە بۆ کۆمەڵگاکان لە ڤایرۆسى کۆرۆنا، بۆ برسێتیش دەرمان هەیە.

 

برسێتى دەرمانى هەیە، کاتێک خەڵک سەر بۆ رێنماییە جوانەکانى دروستکەرى ئەم بونە نەوى دەکەن، بۆنمونە (لەپارەکانیان شتێک بدەن بۆ ئەوەى پاکوخاوێن ببنەوە)! (قورئانى پیرۆز سورەتى تەوبە)

بەخشین لە پێناو نەهێشتنى هەژارى و بەشدارى کردن لە رزگارکردنى خاوەن پێویستى و دابینکردنى پێویستیەکەى، یەکەمین پاکژکەرەوەى دڵەکانە، ڤایرۆسی دڵەکانیش بێ وەفایی و ساردوسڕى و دورکەوتنەوەیە لەبەزەیی.

 

لەوەخێکدا دەبینى خەڵک بە برسێتى دەمرن کەچى گەندەڵکاران دەستبەسەر ماڵى گشتى دا دەگرن و مافى هەژاران زەوت ئەکەن و ئەیدزن، ئێستاش هەر کەس ماڵى گشتى بردوە  پێویستە بیگەڕێنێتەوە و بیبەخشێت بۆ ئەوەى لەتاوانى پێشوى پاک بێتەوە  و دەرونى ئاسودە بێت و دڵى لە خەوش و پیسى رزگار بکات، چونکە لە دەستپاکیدا دڵپاکى و ئاسودەیی هەیە .

 

هەروەها سەروەختى کۆرۆنا دەبێت سەروەختێک بێت بۆ راستگۆیی و خۆ پاککردنەوە، خودا تەوبەکاران و ئەوانەى خۆش دەوێت کە خۆیان پاکدەکەنەوە، بێگومان برسێتیش دەرمانێکى هەیە.

 

ئەمە لەسەر ئاستى تاک، بەڵام بابەتەکە ئاستێکى گرنگترى هەیە کە ئاستى گشتى و ئەوەى پەیوەستە بە دەوڵەتان و چۆنیەتى دابەشکردنى سەروەت و سامانەوە.
ئەمەش ئەوەیە کە بە گەشەپێدان یاخود گەشەپێدانى نا هاوسەنگ لە دەوڵەتانى تازە گەشەسەند و ناودەبرێت، لە چوارچێوەى (بەرگرى و شکۆى دەوڵەت) (lopsided development بە بێ ئەوەى بارودۆخى هەژاران بکەنە کارى لە پێشینەیان، بۆیە دەبینیت زۆرێک لەو دەوڵەتانەى بە دەوڵەمەند ناسراون رێژەیەکى بەرز لە هاوڵاتیانیان لە خوار هێڵى هەژاریەوەن.

 

هەروەها بابەتێکى تریش هەیە کە بابەتى باکورى پێشکەوتو و باشورى هەژارە، لە چوارچێوەى جیهانگیرى زبەلاح و دڕندەدا، جیاوازیەکى گەورە لە مۆڵخواردنەوەى پارە لە رۆژئاواى پیشەسازى و کەمى پارە لە رۆژهەڵاتى تازە گەشەسەندودا هەیە.

 

بۆیە، چاوخشاندنەوە بە دادگەریى لە چۆنیەتى دابەشکارى سەروەت و سامان لەنێوان دەوڵەتان و پاشان لەناو یەک دەوڵەتیشدا، سەرەتایەکى زۆرباش دەبێت بۆ لەناوبردنى ئەو هەژاریەى دەبێتە هۆى مردن.

 

بۆیە بابەتەکە گەڕان نیە بەدواى دەرمانى کۆرۆنا، بەڵکو ئاستى تواناى لەخۆگرتنى نەخۆشخانەکانە لەسەرانسەرى وڵاتدا، نەک تەنها لە پایتەخت و شارە گەورەکان بەڵکو لەو شوێنە کەنارانەش کە نەخۆشخانەى واى تێدانیە شایانى مرۆڤ بێت، بۆیە ئەگەر بە وردى تەماشاى بابەتەکە بکەین تێدەگەین دەستپاکى ئەو رێگایەیە کە دەمانگەیەنێت بە دابەشکردنێکى دادپەروەرانەى سەروەت و سامان لەناو خۆى وڵاتدا، هەروەها لەنێوان دەوڵەتانیشدا، برسێتیش دەرمانى هەیە.

 

ئێمە لە سەردەمى کۆرۆنادا لە مردن دەترسین، چونکە لە نەخۆشخانەکاندا نەخۆشى زۆر و لاشەى لەسەر یەک نراوى مردو دەبینین، بەم شێوەیەهەست دەکەین مردن لێمانەوە نزیکە، لەو مردنە دەترسین کە رۆژانە دەیبینین، بەڵام ناترسین یاخود تەنانەت ئاگادارى ئەو مردنە نین کە ساڵانە لە جیهاندا نۆ ملیۆن کەس دەکوژێت.

 

لەکاتێکدا بۆ مردن بەهۆى برسێتیەوە دەرمانێک هەیە ، کە هەموان ئەزانین چیە، لەگەڵ ئەوەش پەلامارى نادەین و بەکارى ناهێنین، چونکە مردن بە هەژارى و قسەکردن دەربارەى ئەوانەى بە هەژارى دەمرن خواستى ئەو کەسانە نیە کە حەزیان بەدەسەڵاتە و دەنگیش بۆ ئەوانە زیاد ناکات کە دەیانەوێ بە دەسەڵات بگەن، ئەمەش بریتیە لە ژەهراوى بونى عەقڵ و دڵ، کە مردنى هەژارانمان لەبیر ئەباتەوە.

 

لەگەڵ ئەوەى مردن دەرمانى هەیە، بەڵام ساڵانە نۆملیۆن کەس بە هۆى هەژاریەوە لەسەراسەرى جیهاندا گیان دەبەخشن.

وەرگێرانى: سبەى
سەرچاوە:
شەرق ئەوسەت

641 جار خوێندراوەتەوە