دیدارەکەی بزوتنەوەى گۆڕان

بە خوێندنەوەیەکى خێرا، لەسەر یەكەمین دیداری بزوتنەوەی گۆڕان كە تایبەت بو بە بنەما فکرییەکانى کارى سیاسى، سەرەتایەکى دڵخۆشکەر و ئومێدهێنەر بو.

ئەو هەوڵ و خەباتەی كە بزوتنەوەی گۆڕان لە ماوەی زیاتر لە (10) ساڵی رابرد و كاری بۆ دەكرد لە هەرێمی كوردستان، بە رێژەیەک لە رێژەکان رەنگدانەوەی هەبوە، چ لەسەر ئاستی سیاسەتی حیزبەكان چ لەئاستی ئیدارەدانی حكومەت و پێشكەشكردنی خزمەتگوزاری و تاڕادەیەكیش شەفافیەت.


ئەگەر دیدارەكەی گۆڕان وەك نمونە بێنینەوە بۆ سیاسەتكردنی حیزبەكان، ئەوە باشترین پێوەرە بۆ ئەوەی كە خەباتەكەی گۆڕان ئەنجامی هەبوە، گۆڕان دیدارێك ساز دەكات و بێ ترس و سڵەمینەوە بەكۆی میدیای (بینراو، بیسراو و نوسراو) دەڵێت وەرن روماڵی بكەن، بێخەم لەوەی كە كێ رەخنە دەگرێت كێ قسەی خراپ دەكات كێ لە بزوتنەوەكە رازییە یان ناڕازییە، بە راستی بۆ ناوخۆی حیزب ئەمە ئەركێكی قورسە خۆت بخەیتە بەردەم رەحمی میدیا بەتایبەتیش میدیای بینراو و راستەوخۆش وێنە راستەقینەکە بگوازێتەوە، بۆیە ئەوەی گۆڕان لەو دیدارەیدا كردی ئازایەتیەكی بێ وێنە بو، لەكاتێكدا ئەو دیدارەی ئەنجامدا کە لێرەو لەوێ رەخنەی توند و جدیش لە گۆڕان دەگیرێت، بەڵام چونكە گۆڕان بڕیاری داوە ئەو گۆڕانە بێت كە خەڵك دەیەوێت و بۆخەڵك بوە هەڵقوڵاوی ناوخەڵكە، وە خۆی بەشێوەیەكی نوێ رێكبخاتەوە گرفتی نیە بە هەرشێوەیەك بیەوێت كاری خۆی دەكات و دەشیەدەوێت هەمو كاوربار و بڕیارەكانی بەبەشداری خەڵك بێت.


ئێستاش كاتی ئەوەیە بەڕاستی لەو جۆرە دیدارە بۆ كۆی هەڵسوڕاوانی و خەڵكی رۆشنبیرو رەخنەگرانی ئەنجام بدات، چونكە رەخنەكان کەرەستەى هێزن و دەتوانرێت پایەکانى گۆڕانکارى پێ بەهێزتر بکرێن و ببیتە ئەو هێزە سیاسیەی كە خۆت دەتەوێت و بەدڵی دەوروبەریشت بێت، ئەوەی بینیمان دیدارەكە خەمی هەموان و خەمی گۆڕان بو كە بەردەوام بێت لە خەباتە سیاسیەکەى.


هەموانیش كۆكن گۆڕان هەر گۆڕانەكەی خۆی بێت بەو شێوەیەی كە خەباتی كردوە، ئومێد و هیواكان زۆرن بۆ كۆكردنەوەی هەموان لەژێر چەتری بزوتنەوەی گۆڕان و گۆڕانكاری بەتایبەت كە هەمومان گۆڕانكاری جدیمان دەوێت و هەمومان كۆكین لەسەر باشترین كردنی ژیانی هاوڵاتیان، هەنگاوەكان بەردەوام بكەن دیدارەكان زیادبكەن رەخنە بنیاتنەرەكان بنوسنەوە با گۆڕان بەیەكەوە گەورە بكەینەوە، هەمومان  كۆببینەوە بۆ خزمەتکردنى زیاترى هەرێمى كوردستان تا هەموان لەسایەیدا بحەوێینەوە.

626 جار خوێندراوەتەوە