دە ساڵ لەمەوپێش، بزاڤێکی نوێ بە دیدێکی نوێ و دنیابینییەکی نوێ، بەچەکی مەدەنییانەی هەڵبژاردن و دانبەخۆداگرتن و رەخنەی بابەتییانە، ئاڵنگاریی ئەو واقیعە تاڵەی کرد، کە خەریکبوو سەرتاپای بەرهەم و خەرمانی چەند ساڵەی دوورودرێژی خەباتی رابردووی سیاسی و چەکداری و ململانێ مانەوە لە پاش ئەنفال و کیمیاییباران و گەڕانەوە لە لێواری مەرگ بسڕێتەوە و بیکات بە قوربانیی حەز و خواستە تایبەتیی و تاکەکەسییەکان و بەرژەوەندییە خزمایەتیی و هاوڕییەتی و نزیکییە تایبەتییەکان.
گۆڕان هاتە مەیدان و رووبەڕووبوونەوەی دەستەویەخەی گەرمی هەڕەشەکردن بەخوێنی گۆڕی بۆ کێبڕکێی مەدەنییانەی دەنگدان و ناو هۆڵی نوێنەرایەتییە جیاوازەکان و رەنگە جیاوازەکان، ململانێی دەستکەوتە تایبەتییەکانی ناو بازنە تەسکەکانی گۆڕی بۆ شەڕی چاکسازی و وەڵامدانەوەی داواکارییە فراوانەکانی خەڵک.
گۆڕان، هەر شێوازی حزبایەتی و رێکخراوەیی سیاسی نەگۆڕی، گۆڕان هەر کۆتایی بە سەرکردایەتی هەتاهەتایی نەهێنا، کە ئەمانە زیاتر لە چوارچێوەی بازنەی رێکخراوەیی حزبیدا دەخولێنەوەو دەبینرێن و ئاساییە هاوڵاتیی ئاسایی بایەخی بۆیان نەبێت، بەڵکو گۆڕان هۆشیاریی بەرهەمهێنا، هۆشیاریی تاکەکانی کۆمەڵ بەرامبەر بە خواستەکانی و ئەو جیهانەی پەیوەندیی بەوەوە هەیە و ئەو لێی بێئاگاکراوە، بەرچاوڕوونی دایە خەڵک، کە ژیان تەنیا تاپۆنەکراوە لەسەر نەوەکانی شاخ و ئەوانەی میراتگری قۆناخی چەکداریین و ئەوانەی بەرنامەی بەردەوامیی هەتاهەتاییان بۆ خۆیان و نزیکەکانیان داڕشتووە.
گۆڕان، دەساڵ لەمەو پێش، لە (25/7/2009)، ئیعلانی بوونی ناعەدالەتی و پاوانخوازیی و نایەکسانی و نەبوونی دەرفەتی یەکسان لەبەردەم تاکەکانی کۆمەڵی کرد لەسایەی دەسەڵاتی خۆبەڕێوەبەریی کوردییدا، ئەوەی ئەمڕۆ کە دەسەڵاتداران و بەرپرسە سیاسییە باڵاکانی ئەم هەرێمە باسی لێوە دەکەن و بەشیرپەنجەی ئیدارەدان و سیاسەتکردن لە هەرێم باسی دەکەن، کە باس لە حەتمیەتی چاکسازی و نەهێشتنی ناعەدالەتی و کۆتاییهێنان بە پاوانخوازی و بەدامەزراوەکردنی حوکمڕانیی دەکەن، گۆڕان لەپێناویدا دامەزراوە و بەشێکن لە بەرنامە چاکسازییەکەی دەساڵ لەمەوپێشی گۆڕان.
گۆڕان، قوربانییداوە و خەبات دەکات و بەردەوامە لە پێناو بەرهەمهێنان و فراوانکردن و گواستنەوەی رەخنەی بابەتی و عەقلانی لەناو بازنەی کاری رێکخراوەیی حزبییەوە، زیاتر بۆ ناو پانتایی پێکهاتەکانی کۆمەڵگە.
گۆڕان، کاریکردووە بۆ ئاشتکردنەوەی خەڵک و حکومەت و متمانە دروستکردن لە نێوانیاندا، چونکە هەردووکیان دوو رووی دراوێکن و بەبێ یەکتری لە بەهایان کەمدەبێتەوە.
گۆڕان، بەقووڵی لە خەمی ئەوەدایە کە هەموو تاکێکی ئەم کۆمەڵە لە بۆڵەبۆڵ و منگە منگی لابەلا و جنێوی نابابەتی و دەستدانە یەخەی یەکتر، کە بەرهەمی بیری داگیرکەران و پەروەردەی مەبەستداری ئەوانە بۆ دروستبوونی ناسەقامگیریی، بگۆڕێ بە ڕەخنه‌گرتنی بابەتییانە، بە جۆرێک لە قازانجی گشتییدابێت و لە پێناو بەرهەمهێنانی چاکەی هەموواندابێت.
گۆڕان، خواستیەتی و کار بۆ دروستکردنی گیانی لێبوردەیی و گفتوگۆی راستگۆیانەی رێزلێگیراو دەکات، خەبات بۆ داهێنانی ئارامی و دانبەخۆداگرتن دەکات، ئەگەرچی رێگەیەکی درێژ و بێ بەربەست نییە، بەڵام تاکە رێگەیە بۆ گۆڕینی تێگەیشتنی بیری تاکەکانی کۆمەڵگە لە ئاست خەمە کۆمەڵایەتی و نیشتمانی و نەتەوەییەکاندا.
گۆڕان، خەمی کۆمەڵگەیە، وەڵامی ئەو مێژووە پڕ لە هەڵکشان و داکشانەیە کە لە رابردووی ئێمـەدایە بەدوامانەوەیە و ناهێڵن لێمانببێتەوە، ئەگەر خۆمان ویستی بەجێهێشتن و رێگەگۆڕینمان نەبێت.
گۆڕان، تەنیا بزوتنەوەیەکی سیاسی نییە، هێندەی خواستێکی نیشتمانی و کۆمەڵایەتی و نەتەوەییە لە پێناو گۆڕینی ئێستایەک، کە وەڵامی رای گشتی ئێمە ناداتەوە. ئێستا گۆڕان، تەنیا ناوێک نییە بۆ بزووتنەوەیەک کە دەساڵ لەمەوبەر خۆی راگەیاند، بەڵکو رێبازێکە بۆ دەبازبوون لە دێوەزمەی رابردووی مێژووی شکان و لاوازی و پەلاماردراو، کە تەنیا شاخەکانی بە دۆستی خۆی دەزانی و نامۆبوو بەخۆی و بە داهاتوو.
835 جار خوێندراوەتەوە