رێگای تر هەبوون، بەڵام راست نەبوون ..

بزاڤێکی نوێ بە دیدێکی نوێ و دنیابینییەکی نوێ، بەچەکی مەدەنییانەی هۆشیاریی کۆمەڵ و هەڵبژاردن و دانبەخۆداگرتن و رەخنەی بابەتییانە، ئاڵنگاریی ئەو واقیعە تاڵەی کرد، کە متمانە بەخۆبوونی لە ناخی تاکی ئێمەدا تاریک کردبوو.


زۆربوون ئەوانەی چەکیان دەکردە دیاری دەستیان، بۆ ئەوەی گۆڕان لێیان وەربگرێت و وەکو ئەوانی دیکە رێگای سەرکەوتن بۆ خۆی بگرێت، لەوانە بوو بە چەک گۆڕان زووتر سەربکەوتایە، زووتر دەسەڵاتی سەربازی و دارایی و پانتایی کۆمەڵایەتی بۆ خۆی بەدەستبهێنابایە، بەڵام دەیزانی بەم جۆرە سەرکەوتنە هۆشیاریی و پرەنسیپەکانی دامەزراوەی نیشتمانی و خەونی ئایندەیەکی باشتر بۆ هەمووانی لەدەستدەدا و دەبوو بەهێزێکی تر لە پاڵ ئەو هێزانەی ئەمڕۆ تەواوی کۆمەڵی ئێمە بەدەستیانەوە گیرۆدەیە.


گۆڕان، رێگا سەخت و دور ودرێژ و پڕ بەربەستەکەی گرتەبەر، رووبەڕووی رەخنە و گازاندە و گلەیی بە هەق و ناهەقی یار و نەیارانی بووەوە و دەبێتەوە، زۆربوون ئەوانەی هەموو توانا مرۆیی و دارایی و سەربازیی و عەقڵییەکانی خۆیان لە دژی بەکارهێنا، جنێو و هەڕەشە و تۆمەت نەما بۆی نەنێرن، بێ ئاگا لەوەی ئەو رێگایە رێگا دروستەکەی بونیادنانی کۆمەڵگە و گوڵڕێژکردنی ئایندەیە، گرنگ نییە چەندی پێدەچێ و چەندن ئەوانەی شانی دەدەنە بەر و بەرگەی بەردەوامیی دەگرن، لەپاڵیشیاندا چەندانێک چاوی بەرژەوەندییان تێرنابێت و پێدەخەنەبەر رەوڕەوەکانی رێکردنی و تائەگەری بەرەنگاربوونەوە و پێهەڵشاخانی و خوازیاربوون لە دوای خۆیان ماڵێکی وێران ببینن، بەڵام نزای ئۆخەی کردنێکیان بە خۆیانەوە نەبینی.


گۆڕان، هەر شێوازی حزبایەتی و رێکخراوەیی سیاسی نەگۆڕی، گۆڕان هەر کۆتایی بە سەرکردایەتی هەتاهەتایی نەهێنا، کە ئەمانە زیاتر لە چوارچێوەی بازنەی رێکخراوەیی حزبیدا دەخولێنەوەو دەبینرێن و ئاساییە هاوڵاتیی ئاسایی بایەخی بۆیان نەبێت، بەڵکو گۆڕان هۆشیاریی بەرهەمهێنا، هۆشیاریی تاکەکانی کۆمەڵ بەرامبەر بە خواستەکانی و ئەو جیهانەی پەیوەندیی بەوەوە هەیە و ئەو لێی بێئاگاکراوە، بەرچاوڕوونی دایە خەڵک، کە ژیان تەنیا تاپۆنەکراوە لەسەر نەوەکانی شاخ و ئەوانەی میراتگری قۆناخی چەکداریین و ئەوانەی بەرنامەی بەردەوامیی هەتاهەتاییان بۆ خۆیان و نزیکەکانیان داڕشتووە.

 

گۆڕان، لە (25/7/2009)، ئیعلانی بوونی ناعەدالەتی و پاوانخوازیی و نایەکسانی و نەبوونی دەرفەتی یەکسان لەبەردەم تاکەکانی کۆمەڵی کرد لەسایەی دەسەڵاتی خۆبەڕێوەبەریی کوردییدا، ئەوەی ئەمڕۆ کە دەسەڵاتداران و بەرپرسە سیاسییە باڵاکانی ئەم هەرێمە باسی لێوە دەکەن و بەشێرپەنجەی ئیدارەدان و سیاسەتکردن لە هەرێم باسی دەکەن، کە باس لە حەتمیەتی چاکسازی و نەهێشتنی ناعەدالەتی و کۆتاییهێنان بە پاوانخوازی و بەدامەزراوەکردنی حوکمڕانیی دەکەن، گۆڕان لەپێناویدا دامەزراوە و بەشێکن لە بەرنامە چاکسازییەکەی گۆڕان.

 

گۆڕان، قوربانییداوە و خەبات دەکات و بەردەوامە لەپێناو بەرهەمهێنان و فراوانکردن و گواستنەوەی رەخنەی بابەتی و عەقلانی لەناو بازنەی کاری رێکخراوەیی حزبییەوە، زیاتر بۆ ناو پانتایی پێکهاتەکانی کۆمەڵگە.

گۆڕان، کاریکردووە بۆ ئاشتکردنەوەی خەڵک و حکومەت و متمانە دروستکردن لە نێوانیاندا، چونکە هەردووکیان دوو رووی دراوێکن و بەبێ یەکتری لە بەهایان کەمدەبێتەوە.

 

گۆڕان، بەقووڵی لە خەمی ئەوەدایە کە هەموو تاکێکی ئەم کۆمەڵە لە بۆڵەبۆڵ و منگە منگی لابەلا و جنێوی نابابەتی و دەستدانە یەخەی یەکتر، کە بەرهەمی بیری داگیرکەران و پەروەردەی مەبەستداری ئەوانە بۆ دروستبوونی ناسەقامگیریی، بگۆڕێ بە ڕەخنگرتنی بابەتییانە، بە جۆرێک لە قازانجی گشتییدابێت و لە پێناو بەرهەمهێنانی چاکەی هەموواندابێت.

 

گۆڕان، خواستیەتی و کار بۆ دروستکردنی گیانی لێبوردەیی و گفتوگۆی راستگۆیانەی رێزلێگیراو دەکات، خەبات بۆ داهێنانی ئارامی و دانبەخۆداگرتن دەکات، ئەگەرچی رێگەیەکی درێژ و بێ بەربەست نییە، بەڵام تاکە رێگەیە بۆ گۆڕینی تێگەیشتنی بیری تاکەکانی کۆمەڵگە لە ئاست خەمە کۆمەڵایەتی و نیشتمانی و نەتەوەییەکاندا.

 

گۆڕان، خەمی کۆمەڵگەیە، وەڵامی ئەو مێژووە پڕ لە هەڵکشان و داکشانەیە کە لە رابردووی ئێمـەدایە بەدوامانەوەیە و ناهێڵن لێمانببێتەوە، ئەگەر خۆمان ویستی بەجێهێشتن و رێگەگۆڕینمان نەبێت.

 

زۆرن ئەوانەی لە ناوخۆ و لە دەرەوە، نایانەوێ ئەم کۆمەڵەی ئێمە رێگایەکی تر بۆخۆی تاقی بکاتەوە، نایانەوێ و رێگرن لەوەی کۆمەڵی ئێمە چەکی دەستی بگۆڕێت بە چەکی هزری، بەڵام پرسیارەکە ئەوەیە، ئایا خۆمان چیمان دەوێ؟ ئایا ئیتر لەوە تێنەگەیشتین ئەو رێگا کۆنەکە وەک شەمەندەفەرێکە کە نەگات بە هیچ وێستگەیەک و سوتەمەنی خەرج بکات و بڕوات و بڕوات و نەگات بە هیچ؟

 

گۆڕان، تەنیا بزوتنەوەیەکی سیاسی نییە، هێندەی خواستێکی نیشتمانی و کۆمەڵایەتی و نەتەوەییە لە پێناو گۆڕینی ئێستایەک، کە وەڵامی رای گشتی ئێمە ناداتەوە. ئێستا گۆڕان، تەنیا ناوێک نییە بۆ بزووتنەوەیەک کە دوانزە ساڵ لەمەوبەر خۆی راگەیاند، بەڵکو میتۆدێکە بۆ دەبازبوون لە دێوەزمەی رابردووی مێژووی شکان و لاوازی و پەلاماردراو، کە تەنیا شاخەکانی بە دۆستی خۆی دەزانی و نامۆبوو بەخۆی و بە داهاتوو.

 

807 جار خوێندراوەتەوە