سەرۆکی پارتی نەتەوەپەرستی تورکیا پێشوازی لە دانانی پارێزگارێکی تورکمان بۆ کەرکوک دەکات و دەڵێت، ئەو پێکهاتەیە بێ پشت و پەنا نین و کەس ناتوانێت پشتگوێیان بخات.

دەوڵەت باخچەلی، سەرۆکی پارتی نەتەوەپەرستی تورکیا (مەهەپە)، جەخت لە گرنگیی پێگەی پێکهاتەی تورکمان لە شاری کەرکوک دەکاتەوە و ڕایدەگەیەنێت، قۆناغێکی نوێ و گرنگ لە شارەکەدا دەستیپێکردووە و لە ئێستاشدا تورکمانەکانی کەرکوک بێ پشت و پەنا نین.

سەرۆکی مەهەپە لە لێدوانێکدا سەبارەت بە ڕەوشی کەرکوک ئاماژەی بەوە کرد، مێژوو و خەباتی تورکمان لەو شارەدا بزر نابێت و هیچ لایەنێک ناتوانێت ئەو پێکهاتەیە پشتگوێ بخات.

هاوکات جەختی لەوەش کردەوە کە وڵاتەکەی کەرکوک و موسڵ لە بیر ناکات.

لە بەشێکی دیکەی وتەکانیدا، باخچەلی باسی لە پەیوەندیی ڕۆحی و سیاسیی نێوان تورکیا و کەرکوک کرد و ڕایگەیاند: "ئەو نزایانەی لە ئەنقەرە کران، لە کەرکوک وەڵام درانەوە."