سەرۆکی ئەمریکا پەیامی نوێی بۆ پاپای ڤاتیکان، ناتۆ و ئێران هەیە و دەشڵێت، لە دوو رۆژی داهاتوودا شتی چاوەڕواننەکراو روودەدەن.

دۆناڵد ترەمپ سەرۆکی ئەمریکا سەبارەت بە نیگەرانییەکانی پاپای ڤاتیکان سەبارەت بە شەڕ لە دژی ئێران رایگەیاند: "تکایە یەکێک پاپا ئاگادار بکاتەوەکە ئێرانی خاوەنی چەکی ئەتۆمی بە هیچ شێوەیەک قبوڵ ناکرێت، هەروەها یەکێک تێیبگەیەنێت کە ئێران دوو مانگ بەر لە ئێستا 42 هەزار خۆپیشاندەری بێتاوان و بێ چەکی کووشتووە.

سەبارەت بە پەیمانی باکووری ئەتڵەسی (ناتۆ) جارێکی تر تووڕەیی خۆی نیشاندا و رایگەیاند، ناتۆ لەلای ئێمە نەبووە و لە داهاتووشدا لە لای ئێمە نابێت.

ترەمپ بەشێک لە قسەکانی تەرخان کرد بە ئێران و سەرەتا لەبارەی درێژکردنەوەی ئاگربەستەوە وتی، کە بەپێویستی نازانێت درێژبکرێتەوە و بێ ئەوەی زیاتر روونکردنەوە بدات وتی، "لە دوو رۆژی داهاتوودا شتی چاوەڕێنەکراو و سەرسوڕهێنەر دەبینین".

جەختیشی کردەوە، بۆ ئێران واباشترە کە بگاتە رێککەوتن، چوونکە رێگە بەو وڵاتە دەدات دەست بە ئاوەدان کردنەوە بکات.

ترەمپ جارێکی تر جەختی لەوەکردەوە، کە سیستمی دەسەڵاتداری ئێران گۆڕاوە و لە جێگەی کەسانی توندڕەو کە لەلایەن ئەمریکاوە لادراون، لەئێستادا کەسانی جیاواز لە تاران جڵەوی دەسەڵاتیان بەدەستەوەیە.

لەبەشێکی تری قسەکانیدا ئاماژەی بەوەکرد، ئەگەر من سەرۆکی ئەمریکا نەبوومایە، جیهان لەبەریەک هەڵدەوەشایەوە.