جێگری وەزیری تەندروستیی ئێران بڵاویکردەوە، لەماوەی 9 رۆژدا بە هۆی هێرشەکانی ئەمریکا و ئیسرائیل 1255 کەس لەو وڵاتە کوژراون، کە 200 کەسیان ژن بوون.

عەلی جەعفەریان لە لێدوانێکدا رایگەیاند: لە سەرەتای دەستپێکردنی شەڕەوە لە 28ی شوبات، تائێستا هەزار و 255 کەسی مەدەنی کوژراون.

باسی لەوەشکرد، لەو 9 رۆژەدا زیاتر لە 12 هەزار کەسیش برینداربوون.

جێگری وەزیری تەندروستیی ئێران ئاماژەی بەوەشکرد، کە لە منداڵی ساوا تا بەساڵاچووی تەمەن 88 ساڵ لەناو قوربانیاندا هەیە و لانیکەم 200 ژن لە هێرشەکانی ئەمریکا و ئیسرائیلدا کوژراون.

هەر لە قسەکانیدا ئەو بەرپرسە ئێرانیە رایگەیاندووە، کە بەهۆی هێرشەکانەوە 11 پزیشک و پەرستار کوژراون و 55ی دیکەش برینداربوون.