حكومەتی كاتیی سوریا دەیەوێت بەپشتیوانی ئەمریكاو ئوردن چارەسەری قەیرانی پارێزگای سوەیداو كێشەی دروزەكانی وڵاتەكەی بكات .

هەواڵ: KNN

ئەسعەد شەیبانی وەزیری دەرەوەی سوریا لەمیانەی سەردانەكەی بۆ ئوردن و لەدوای  كۆبونەوەی لەگەڵ ئەیمەن سەفەدی هاوتا ئوردنیەكەی و تۆماس باراك نێردراوی ئەمریكا بۆ سوریا كۆنگرەیەكی رۆژنامەوانی سازكردو تیایدا كە بەپشتیوانی واشنتۆن و عەممان چەند هەنگاوێك بۆ ئاسایی بونەوەی دۆخی پارێزگای سوەیدا دەنێن.

بەوتەی شەیبانی لێپرسینەوە لەگەڵ هەمو ئەو كەسانە دەكرێت كەدەستیان لەرووداوەكانی سوەیدا هەبوە كەتیایدا هاوڵاتیانی دروز روو بەرووی كوشتن و بڕین و سوكایەتی كردن بونەتەوە .

وەك وەزیرەكەی سوریا ئاماژەی پێكردوە زامنی گەیاندنی یارمەتییە پزیشكی و مرۆییەكان بەدانیشتوانی سوەیدا دەكرێت و لەهەمان كاتیشدا قەرەبووی هەمو ئەو كەسانە دەكرێتەوە كە زیان بە ماڵ و شوێنەكانیان گەیشتوە لەگەڵ گەڕانەوەی خزمەتگوزارییە سەرەكییەكان بۆ ئەو پارێزگایە و زەمینە سازی بۆ ئاسایی بوونەوەی ژیان لەسوەیدا.

هەروەها بڵاوكردنەوەی هێزی سەر بەوەزارەتی ناوخۆ و پارێزگاریكردن لەرێگەو بانەكان و هاتوچۆو جموجۆڵی بازرگانی و هەوڵدان بۆ دیاریكردنی چارەنوسی ئەو كەسانەی بێ سەروشوێن و زیندانی و ڕفێنراون ، لەگەڵ دەستكردن بەئاشنبونەوەی ناوخۆیی كە سەرجەم پێكهاتەكانی سویدا تیایدا بەشدار بن.