وەکو دەزانین وەرزش چالاکیەکی جەستەی ودەرونیە دەڵێن ئەقڵی سەلیم لە جەستەیەکی ساخ و تەندروستدایە کە وەرزش بکات، بەڵام پەیوەندی بەهێزی وەرزش بە سەرجەم سێکتەرەکانی سیاسەتی گشتیەوە کە بوارەکانی ڕێکخستنی تەندروستی، ئابوری، کۆمەڵایەتی، دبلۆماسی و ڕەوایەتی سیاسی لە خۆدەگرێت، توانای وەرزش لە دروست کردنی هەستی هاوبەشی نیشتیمانی و نەتەوایەتی، ئەگەر سەیری جیهان بکەین دەبێت تەواوی دەوڵەتان و نەتەوەکان گرنگیەکی گەورە دەدەن بە وەرزش کە خۆی لە خۆیدا وەرزش زۆر  مەبەستی جیاوازی هەیە، ئەوەی لەم ووتارەدا دەمەوێت ئاماژەی پێبکەم پەیوەندی بەهێزی وەرزش بە جیهان بینینێکی فراوانتر و جوانتر، وەرزش تۆ دەناسێنێت کە کێیت و وا دەکات هەست بە شانازی بکەیت لە ناخدا، کە بەتەواوەتی بابەتەکە پەیوەندیدارە بە مەسەلەی ناسنامەی نەتەوەیی و نیشتیمانی.

هەر وەک زانای بەناوبانگی ئەڵمانی ڤۆن هێردەر دەڵێت هەموو کۆمەڵگەیەک تایبەتمەندی خۆی هەیە و شانازی کردن بە کلتور و داب و نەریتی ڕەسەن کە جۆرێکە لە ناسنەمەی تۆ لەو ڕێگەیەوە ئەگەر سەیری چالاکیەکی وەرزشی بکەین وەرزش وەکو پردی کۆکەرەوەی جیاوازیەکان و نزیک کردنەوەی خەڵک لە یەکتری وسڕینەوەی ناکۆکی و جیاوازیەکانە، جەخت کردنەوە لەسەر ناسنامەی نیشتیمانی و نەتەوەیی لە ژێر سایەی یەک ئاڵا و یەک سرودی نیشتیمانی بە دەنگێکی بەرز و بە جۆش و خرۆشەوە کە هاندەران پشتگیری و هاندانی تیمەکەیان دەکەن، نوسەری بەناوبانگی ئەمەریکی سامیۆل هەنتینگتۆن لە کتێبی ئێمە کێین باس لەوە دەکات لە چالاکیەکی تۆپی پێی ئەمەریکا و مەکسیک ئێمە تێگەشتین لە هەست و ڕۆحیەتی هاونیشتمانیان و هاندەران کە لە ڕاستیدا قەیرانی ناسنامەمان هەیە و پێویستە هەنگاوی نوێ بنێین، کەواتە دەبێ بزانین وەرزش بێلایەن نیە و بوون و وجودی وڵاتێکە کە تۆ بە جیهانی بناسێنێت، وەرزش بە میکانیزمێکی پۆزەتیڤی بنیاتنانی نەتەوەسازی و نیشتیمان سازی سەیر دەکرێت، ئەگەر بگەڕێنەوە بۆ مێژوو نمونەیەکی باڵای سیاسی هاوچەرخ.

چیرۆکی ڕێکخستنی پاڵەوانیەتی تۆپی پێی ڕەگبی لە ساڵی ١٩٩٥ لە دەوڵەتی ئەفریقای باشوور ،لە کاتێکدا وڵات دەیناڵاند بە دەست سیاسەتی جیاوازی ڕەگەزی و کۆمەڵگەیەکی دابەشکراو  لەسەر بنەمای ڕەگەز و ڕەنگی پێست، ناکۆکی و کێشەی جیاواز لەنێوان هاوڵاتیانی وولاتەکە ،سەرۆک کۆماری وردبینی وڵات نلسۆن ماندێلا لە گرنگی بابەتی وەرزش تێگەشتبوو بۆ بەرزکردنەوەی هەستی نیشتیمان پەروەری و نەهێشتنی جیاوازیەکان کەوتە هاندان و پشتگیری کردنی تیپی ڕەگبی سپی پێستەکان لە کاتێکدا بووە هۆی ناڕەزایی زۆربەی خەڵکی وڵاتەکەی و حزبەکەی (کۆنگرەی نیشتیمانی ئەفریقی)، بەڵام لە دەرئەنجامدا سەرۆک  توانی باوەڕیان پێبهێنێت کە ئەو لە پێناو نیشتیمانێکی بێ جیاوازی و دروست کردنی هەستی هاوبەشی هاوڵاتیبوون ئەو کارەی کردووە ، ئەمەش بووە گەورەترین وانەی مێژووی و سیاسی کە وەرزش هۆکارێکە بۆ یەکێتی نیشتیمانی و نەتەوەیی و پەیوەندیەکی تەندروست و دۆستانە لە نێوان هەمووان، بۆیە پاڵاوتنی یانەی زاخۆ لە فیفا، ئەوەمان پێدەڵێت کە ئێمەش وەکو نەتەوە و گەلانی جیهان دەمانوێت بوونمان هەبێت، ناسنامەمان هەبێت، دەمانەوێت لە دایکبین وەکو نەتەوە و دەوڵەت، خۆشبەختانە ئەوەی دەبینرێت هاوڵاتیان لەسەرجەم پارچەکانی کوردستان و سەرجەم شارەکان کۆمێنت و پشتگیریەکانیان بۆ یانەی زاخۆ دەردەبڕن بەبێ جیاوازی سیاسی و ئایدۆلۆجی و ناوچەیی، ئەمە مایەی خۆشبەختیە بۆیە پێویستە نەتەوەی کورد وەرزش بکاتە ئامڕازێکی گرنگ بۆ بنیاتنانی نیشتیمان و شکۆ و شانازی کردن بە کورد و کوردستان.