لە کۆبونەوەی ئەمڕۆیدا ئەنجومەنی وەزیرانی هەرێم، بڕیاریدا بە دامەزراندنی سەرجەم دەرچوانی بەشە پزیشکییەکان و لێخۆشبونی 15%ـشی لە سزای هاتوچۆ درێژکردەوە.

هەواڵ:KNNC

لە بەیاننامەی کۆبونەوەکەدا هاتوە، حکومەتی هەرێم هەوڵ و کارەکانی بەردەوامە بۆ چارەسەرکردنی کێشەی موچەی فەرمانبەران، بۆئەو مەبەستەش سەرۆکی حکومەتی هەرێم نامەیەکی بۆ دادگای فیدراڵی ناردوە سەبارەت بە نایاسایی و نادەستوریبونی بڕیاری بڕینی موچە و شایستە داراییەکانی هەرێمی کوردستان لەلایەن وەزارەتی دارایی فیدراڵەوە، جەختیشکراوەتەوە، حکومەتی هەرێم هەمو پابەندییەکانی خۆی جێبەجێکردوە و خوازیارە لەبەرامبەردا رێز لە مافە دەستورییەکانی بگیرێت و شایستە داراییەکانی بۆ بنێردرێت.

سەبارەت بەپێشهات و پەرەسەندنەکانی شەڕ و ئاڵۆزییەکانی ناوچەکە و کاریگەرییەکانی لەسەر هەرێمی کوردستان، ئەنجومەنی وەزیرانی هەرێم جەختیكردوەتەوە پشتیوانیی هەمو هەوڵێک دەکات بۆ چارەسەرکردنی کێشە و گرفتەکان لەڕێگەی گفتوگۆ و دانوستان و پاراستنی ئاشتی لەعێراق و هەرێمی کوردستان و ناوچەکە.

لە بڕگەیەکی دیکەی کۆبونەوەكەی ئەنجومەنی وەزیراندا، بڕیاردرا بە درێژکردنەوەی ماوەی لێخۆشبونی15% لە سزاکانی هاتوچۆ، بۆماوەی شەش مانگی دیکە.

هاوکات، ئەنجومەنی وەزیران بڕیاریدا بە دامەزراندنی دەرچوانی پزیشکی گشتی لەسەر میلاکی وەزارەتی تەندروستی، بۆئەو مەبەستەش وەزارەتە پەیوەندیدارەکانی راسپارد بۆ گرتنەبەری رێکاری پێویست بەمەبەستی دامەزراندیان.