هێرشی درۆنیی کرایە سەر کێڵگەی غازی کۆرمۆر بەهۆیەوە کارەبای زۆربەی هەرێمی کوردستان کوژایەوە.

هەواڵKNNC

دوێنێشەو کاتژمێر 11:30 بە چەند جارێک هێرشی درۆنیی کرایە سەر کێڵگەی غازی کۆرمۆر لە چەمچەماڵ و بووە هۆی زیانگەیاندن بە چەند کۆگەیەکی غازی ئێڵ پی جی.

هێرشە درۆنییەکە کاریگەرییەکەی تەنها لە کێڵگەکە نەمایەوە، بەڵکو بەهۆیەوە کارەبای بەشێکی زۆری ناوچە جیاوازەکانی هەر چوار پارێزگای هەولێر و سلێمانی هەڵەبجە و دهۆک کوژایەوە.

دوابەدوای هێرشەکە وەزارەتی سامانەسروشتییەکان و کارەبای حکومەتی هەرێمی کوردستان ڕایگەیاند: بەهۆی هێرشەکەوە هەناردەی غاز بۆ تەواوی وێستگەکانی بەرهەمهێنانی کارەبا ڕاگیراوە و تیمی هەردوو وەزارەت و کۆمپانیای دانەغاز لە بەدواداچوونی لێکەوتەکانی هێرشەکەدان.

لای خۆشییەوە ئومێد ئەحمەد وتەبێژی وەزارەتی کارەبای حکومەتی هەرێمی کوردستان ڕایگەیاند: هێرشەکە ئاستی بەرهەمی غازی بەتەواوەتی دابەزاندوە و ئەنجامەکەشی کوژانەوەی کارەبای 80%ی هەرێمی کوردستان دەبێت،

بەپێی زانیارییەکان هێرشەکە ئاستی بەرهەمهێنانی کارەبای لە 4 هەزار مێگاواتەوە بۆ هەزار مێگاوات کەمکردوەتەوە ئەوەش بووەتە هۆکاری کەمتر پێدانی کارەبا بە هاووڵاتییان.

شانەی ڕاگەیاندنی ئەمنیی عێراق هێرشەکەی بە تیرۆرستیی ناوبرد و ڕایگەیاند: ئەو هێرشەی کراوەتە سەر کێڵگەی گازی کۆرمۆر هەڕەشەیەکی ڕاستەوخۆیە بۆسەر بەرژەوەندیی عێراقییەکان و کردەوەیەکی تیرۆریستیی مەترسیدارە بۆ پەکخستن و دواخستنی ئەو هەوڵانەی دەدرێن بۆ چەسپاندنی سەقامگیریی ئەمنی و ئابووری لە وڵات.

هاوکات ئاژانسی هەواڵی تەسنیمی ئێرانیش بابەتەکەی بڵاوکردەوە و ڕایگەیاند: بە سێ درۆن هێرشکراوەتە سەر کێڵگەی غازی کۆرمۆر لە هەرێمی کوردستان....