سەرۆکی هەرێمی کوردستان پێشوازی لە ڕێککەوتنی نێوان ئەمریکا و ئێران دەکات و هیوادەخوازێت ئەم هەنگاوە ببێتە هۆی بەهێزکردنی سەقامگیری، ئاسایش و خۆشگوزەرانی لە ناوچەکەدا.

نێچیرڤان بارزانی، سەرۆکی هەرێمی کوردستان، لە پەیامێکدا کە لە هەژماری تایبەتیی خۆی لە تۆڕی کۆمەڵایەتیی (ئێکس) بڵاویکردووەتەوە، ڕایگەیاند: "پێشوازی لە ڕاگەیاندنی ڕێککەوتنی نێوان ئەمریکا و ئێران دەکەم."

سەرۆکی هەرێمی کوردستان لە پەیامەکەیدا ئاماژەی بە گرنگیی جێبەجێکردنی ڕێککەوتنەکە کردووە و دەڵێت: "هیوادارم هەموو لایەنەکان بە نیازپاکییەوە کار بکەن بەرەو جێبەجێکردنی تەواوەتیی ڕێککەوتنەکە، بەو ئامانجەی سەقامگیری، ئاسایش و خۆشگوزەرانی لە ناوچەکەدا بەهێز بکات."

لە کۆتایی پەیامەکەیدا، نێچیرڤان بارزانی سوپاس و پێزانینی خۆی ئاراستەی ئەو لایەنانە کردووە کە هاوکار بوون و دەڵێت: "پڕبەدڵ پێزانینی خۆم ئاراستەی هەموو ئەو کەسانە دەکەم کە ڕۆڵیان لە ئاسانکاری و پشتگیریکردنی ئەم دەستکەوتەدا هەبووە."