لە دوای هێرشە نوێیەکانی نێوان ئەمریکا و ئێران بۆ سەر یەکتر، نرخی نەوت بەرزبوونەوەی نوێی بەخۆیەوە بینی و بەهای دۆلار و پێوەرەکانی بازاڕی پشکەکانیش دابەزینیان تۆمارکرد.

لە یەکەم کاتژمێرەکانی دەستپێکردنی کارەکانی بازاڕە داراییەکانی ڕۆژهەڵاتی ئاسیا، بەهای دۆلار بەرامبەر دراوە سەرەکییەکانی وەک پاوەندی بەریتانی، یۆرۆ و یەنی ژاپۆنی دابەزینێکی کەمی تۆمارکرد. لە لایەکی دیکەوە، نرخی نەوت جارێکی دیکە ڕووی لە بەرزبوونەوە کرد؛ بە جۆرێک نرخی بەرمیلێک نەوتی خاوی برێنتی دەریای باکوور بە ڕێژەی %1.7 بەرزبووەوە و گەیشتە 94 دۆلار و 68 سەنت، هەروەها نەوتی خاوی تەکساسیش بە ڕێژەی %2 گەشەی کرد و گەیشتە 91 دۆلار و 84 سەنت.

هاوکات، ڕێژەی هەڵاوسانی ساڵانە لە ویلایەتە یەکگرتووەکانی ئەمریکا بە ڕێژەی %0.4 بەراورد بە مانگی ڕابردوو زیادی کرد و گەیشتە %4.2، کە لە ماوەی زیاتر لە سێ ساڵی ڕابردوودا هاوشێوەی نەبووە.

 لە هەمان کاتدا، چاوەڕوان دەکرێت بانکی ناوەندیی ئەوروپا و یەدەگی فیدراڵیی (بانکی ناوەندیی ئەمریکا) بۆ یەکەمجار لە ماوەی زیاتر لە سێ ساڵی ڕابردوودا، نرخی سوو بەرز بکەنەوە و پێشبینیش دەکرێت بانکی ناوەندیی ئەوروپا لە ماوەی پێنج مانگی داهاتووی ئەمساڵدا، لانی کەم دوو جاری دیکە نرخی سوو زیاد بکات.