بزوتنەوەی گۆڕان و هەنگاونان بەرەو قۆناغێكی چارەنوس ساز

بێگومان لە مێژووی سیاسی و حكومرانی هەرێمی كوردستاندا پاوانخوازی دەسەڵات و سەرمایە لەسەروی تەواوی  یاساوە دەبینرێت، هەروەك چۆن هەردوو پارتی دەسەڵاتدار لە رێگەی پاوانخوازی دەسەڵاتیانەوە بەردەوام دەستیان بەسەر ئابوری و جومگە سیاسیەکان و حكومڕانییدا گرتووە.


لە ساتەوەختی دروستبوونی بزوتنەوەی گۆڕان لەسەردەستی سیاسەمەندار و بیرمەند و سەركردەی دیاری کورد "نەوشیروان مستەفا" قۆناغ و هەنگاوێكی گرنگ و هەڵكشان بوو بەرەو هوشیاری و زیندووکردنەوەی ڕۆحیەتی باڵا بۆ چاکەی گشتی، واتە یەكەمین هەنگاوی خۆی بۆ هوشیاری گشتی كۆمەڵگا هاویشت هەڵبەتە چۆن لایەنی تێگەیستن و هوشیاری هەركۆمەڵگایەك زۆر گرنگە، گەر وەك پێویست دەركی پێنەكرێت و هەوڵی بۆ نەدرێت ئەستەمە رەوشی هەرێمەكە شیكارو چارەسەر بكرێت و بتوانرێت تاوتوێكردن و هەڵوەستە كردنێكی بایەخدار سەبارەت بە تەواوی كێشە سیاسییەكان پێشبخرێت.

 

بزوتنەوەی گۆڕان لەسەرەتای دامەزراندییەوە توانی جوڵەو بەرگێكی نوێ بە بەر سیاسەتدا بكات

 

بزوتنەوەی گۆڕان لەسەرەتای دامەزراندییەوە توانی جوڵەو بەرگێكی نوێ بە بەر سیاسەتدا بكات و سەركردایەتی بەرەی خەڵک بكات و بەداكۆكی و سوربونێكی زۆرەوە هەوڵی ئەوەی داوە نەخۆشییەكانی ناو سیاسەت و كۆمەڵگا بوەستێنێت و چارەسەری بكات، لە سۆنگەی رەخنەگرتن لە سیستەم و ئەو پێکهاتە ناجۆرەی حکومڕانی، کە بەجۆرێک دەسەڵاتی پارتی و یەکێتی گورزێکی کوشندەیان لە خەون و ئامانجە باڵاکانی خەڵکی کوردستان وەشاندوە، بەچەشنێک ئەو رەخنانەشی لە بوارەكانی مۆراڵ و سیاسییەوە ئاراستەی دەسەڵاتی پارتی و یەكێتی كردوە چ لەسەردەمی ئۆپۆزسیۆنبونییەوە تا دەگاتە بەشداریكردنی لە حكومەتدا.

بەدڵنیاییەوە هەروەك چۆن هەرهێزێكی سیاسی لە دنیادا رووبەرووی قەیران و گرفتی نێو خۆیی ئەبێتەوە، بێگومان گۆڕانیش وەك هێزێكی سیاسی ئەم دنیایە بێبەری نییە لەو گیروگرفتانە، بۆیە چارەسەركردنی كێشەكانی گۆڕان بە تەنها نەبەستراوە بە خودی چەند كەسانێكەوە لەناو بزوتنەوەكەدا، بەڵكو بەستراوە بەوانەی چەندین ساڵە بەگیانی گۆڕانخوازییەوە خۆرسكانە لە هەوڵی بەهێزكردن و بەردەوامیدانی ئەم بزوتنەوەیەن، كە ڕووبەڕووی سیستەمە شكستخواردوەكەی دەسەڵاتداران وەستاوتەوە  تا بە شێوەیەكی بنچینەیی هاوسەنگی بۆ كۆمەڵگاو یاسا و کەرامەتی ئینسانی کورد بگەرێتەوە.

 

دەکرێت بەپەلە بزوتنەوەی گۆڕان هەنگاو بۆ چارەسەركردنی كێشە ناوخۆییەكانی بنێت 

ئەمڕۆی هەرێمەكە و ناوچەكەش بە قۆناغێكی هەستیاردا تێدەپەرێت، بۆیە دەکرێت بەپەلە بزوتنەوەی گۆڕان هەنگاو بۆ چارەسەركردنی كێشە ناوخۆییەكانی بنێت کۆی ئەو رەخنانەی لەلایەن گۆڕانخوز وخەمخۆرانەوە لێدەگرین بە هەندەوە لێیبڕوانێت و شەن و کەوی بكات و ئاڕاستەی رەخنەکانی خەڵک و لایەنگرەکانی بکات، تاوەکو سودی پێویست و گونجاو لەم رەخنانە وەربگیرێت، بۆ ئەوەی لەو رێگەیەوە دەرفەتی چارەسەری وەربگرێت و لەسەر دیدگا و بنەمای رەخنەكانی هەوڵی چارەسەری کێشەکانی بزوتنەوەكە بدەن.

لە دۆخێكی وەهادا گۆڕان رێگای سێیەمی نییە، تەنها دوو رێگایەو هیچ تر، ئەوانیش یان دەستگرتنە بە پرنسیپە بنەڕەتییەکانی و گۆڕانکاری هەمەجۆری لە خودی بزووتنەوەکەدا یان تەسلیمبوون بە دۆخی نەخوازرازی هەرێم.

 

کارێکی زۆر ئاساییە هێزێکی سیاسی وەک بزووتنەوەی گۆڕان توشی ململانێ و کێشەی جۆراجۆری ناوخۆیی و دەرەکی ببێت

کاتێک هەر حزب و رێکخراوێکی سیاسی خۆی رادەگەیەنێت هەر لەسەرەتاوە بەململانێی ناوخۆی دەستپێدەکات، چونکە هەم سروشتی ژیانی مرۆڤ و هەم سیاسەت و ژیانی حزبایەتی و رێکخراوەیی وا دەخوازێت، کەواتە کارێکی زۆر ئاساییە هێزێکی سیاسی وەک بزووتنەوەی گۆڕان توشی ململانێ و کێشەی جۆراجۆری ناوخۆیی و دەرەکی ببێتەوە، بەڵام کاتێک  ململانێ ناوخۆییەکان بەرەو ناکۆکی و دژایەتی ناڕەوایی و شەخسی دەڕوات، ئەوسا ناتوانین بڵیین دۆخەکە ئاسایی و سروشتیە، چونکە قوڵبوونەوەی کێشەکان بەئاراستەی ناکۆکی و مەترسی لاوازبوونی گۆڕانە و دەچێتە خانەی نابەرپرسیایەتی و ناڕاستگۆیی بەرامبەر رۆڵ و پێگەی سیاسی و جەماوەری بزووتنەوەکە و هاوکاتیش دەچێتە خزمەت هێزە پاوانخواز و گەندەڵکارەكانەوە.

 

هەموومان درک بەوە دەکەین، کە گۆڕان توشی کێشەی سیاسی و رێکخراوی بۆتەوە

هەموومان درک بەوە دەکەین، کە گۆڕان توشی کێشەی سیاسی و رێکخراوی بۆتەوە، بۆ دەربازبوون لەو دۆخەی تێکەوتووە لەسەر بنەمای تێگەێشتن لە هۆکاری کێشەکانی، دواتر تاکە چارەسەر گەڵاڵەکردنی پرۆژە و نەخشەی هەمەلایەنی لە رێگەی بەستنی کۆنگرەی نیشتمانی بە عەقڵیەتی ژیرانەی نوێخواز و میکانزمی گونجاوە وە  چارەسەری کێشەکانی بکات و بۆ چاکسازی لە کۆی پێكهاتەی دەستوور و هەیکەلی ڕێکخراوەییدا.

دیارە یەكێكی دیكە لە زەرورییەتەكانی هێزی سیاسی و زیندوو گرنگی دانە بەچەندین ئەكادیمیایەكی سیاسی و پەروەردەیی و دامەزراوی گونجاو، دەكرێ بزوتنەوەی گۆڕانیش وەك هێزێكی سیاسی لە رێگەی ئەم ئەكادیمیانەوە یارمەتی زانستی و سیاسی و رۆشنبیری و كۆمەڵایەتی بۆ پێویستییەكانی سەرلەنوێ بنیاد نانەوەی بزوتنەوەكە بدات لە قۆناغە چارەنوسـسازەكاندا بۆ ئەوەی لە بنیادنان و خاوەن ستراتیژی سیاسیدا یارمەتی پێویست دەستەبەر بكات و کادر و کاره‌کتەری نەوعی لە کایەکانی سیاسی وئیداری و سەرکردەدا دروست و پەروەردە بکات. هەروەها لەنێوەندا میدیاگۆڕان وەک پێویستیەکی گرنگ لە رووی جۆری و ناوەڕۆک وتەکنیکەوە دەکرێت گۆڕانکاری تێدا بکرێت.

دواجار ئەوەی بۆ گۆڕان گرنگه‌ هەموو ئەو هەنگاوانە تەنها لە رێگەی بەستنی کۆنگری نیشتیمانی و کۆنفراسە ناوخۆییەکانی دەبێت، بەشێوەیەک تا ببێتە دەروازیەک بۆ  راچڵەکینی بەخۆداچوونەوەو چاکسازی بنەڕەتی ودیاریکڕدنی سیاسەتێکی روون هەم بۆ شێوازی چۆنییەتی بەشداری لە حکومەت و هەم بۆ سەرلەنوێ خۆڕێکخستنەوەی ناوخۆی خۆی، گرنگە هەنگاوی یەکەم بریتیبێت لە دەستنیشانکردنی دەستەیەکی تێکەڵ لە گەنج و ژنان وبەئەزمونەکان چ لە چڤاتی نیشتیمانی و چ لە خانەی راپەڕاندن و هاوشانی رێکخەری گشتی بزووتەوەکە زیاد لە یەک کەس وەک راوێژکار بۆ دیاری بکرێت و لە کۆنگرەشدا جەخت لەسەر پابەندبوونی ئەو پرەنسیبانەی بکرێتەوە کە بزووتنەوەکە وەک دینگەیەک لەسەری وەستاوە.

433 جار خوێندراوەتەوە