لەیاساى سروشتیەوە بۆ قۆناغى پێش یاسا

لە دواى 20/ 8/ 2015ەوە قسەکەرەکانى پارتى دیموکراتى کوردستان بەئاشکرا و راشکاوانە دەیانوت ئێمە لە درێژکردنەوەى ویلایەتى مەسعود بارزانیدا، یاساى سروشتیمان جێبەجێکردوە! ئێستاش بەرپرسى ئاسایشى هەولێر کە ئەندامى پارتیە دەڵێت: لەبەر ئەوەى کادیرێکى پارتى لە گەرمیان دەستگیرکراوە، لە تۆڵەى ئەوەدا ئێمەش کادیرێکى یەکێتیمان دەستگیرکردوە، تا کادیرەکەى پارتى ئازاد نەکرێت، ئێمەش کادیرەکەى یەکێتى ئازاد ناکەین.

 

من وردەکارى رووداوى دەستگیرکردنى کادیرەکەى پارتى نازانم، و هیوادارم لەبەر هۆکارى سیاسى نەبێت و بەپێى رێوشوێنى یاسایى دروست ئەنجامدرابێت، بەڵام ئەوەى من لە راگەیاندنەکانەوەو لە زارى وتەبێژى پۆلیسەوە بیستم و بینیم لەسەر بابەتێکى یاسایى تاوانکارى دەستگیرکراوە.

 

ئەوەى جێگەى داخ و مایەى گریانە لەم کەیسەدا، قسەکەى بەرپرسى ئاسایشى هەولێرە


بەس ئەوەى جێگەى داخ و مایەى گریانە لەم کەیسەدا، قسەکەى بەرپرسى ئاسایشى هەولێرە، بەڕاستى ئەوە گەڕانەوەیە بۆ قۆناغى چاخە سەرەتاییەکان، بۆ قۆناغى پێش مێژوو، بۆ قۆناغى پێش نوسینەوەى یاسا، بۆ قۆناغى باڵادەستى هێز، قۆناغى یەکلایى کردنەوەى کێشەکانه بەهێز.


سەرۆکى حکومەت، راوێژکارى ئەنجومەنى ئاسایش، سەرۆکى دەسەڵاتى دادوەرى، وەزیرى ناوخۆ و پێشمەرگە، سەرۆکى دەزگاى داواکارى گشتى، (45) پەرلەمانتار هى تۆ بێت، بەڵام باوەڕت بەمانە هیچیان نەبێ


باشە کەى مەعقولە سەرۆکى حکومەت، راوێژکارى ئەنجومەنى ئاسایش، سەرۆکى دەسەڵاتى دادوەرى، وەزیرى ناوخۆ و پێشمەرگە، سەرۆکى دەزگاى داواکارى گشتى، (45) پەرلەمانتار هى تۆ بێت، بەڵام باوەڕت بەمانە هیچیان نەبێ و پەنایان بۆ نەبەى بۆ ئازادکردنى کادیرێکى خۆت، لەبرى هەموو ئەوانە تۆش کادیرێکى بێتاوانى حیزبێکى تر بەبارمتە بگریت!!! ئیتر پێم ناڵێن چۆن هاوڵاتى ئاسایى فێربکەین و رابهێنین بۆ وەرگرتنەوەى مافى خۆى پەنا بۆ یاسا و دامەزراوەکان بەرێت کە زۆربەى لەلایەن ئێوەوە قۆرخ کراوە؟ باشە ئەکرێ کەسێک تاوان بکات بەس لەبەر ئەوەى لەم حیزبە یان ئەو حیزبەیە، یان لەم زۆنە یان ئەو زۆنەیە لێپرسینەوەى لەگەڵدا نەکرێت؟ ئەى ئەگەر کەسێک سەر بەیەکێک لەم دوو حیزبە نەبێت کێ لەسەرى دێتە جواب؟

 

ئەم کارو قسەیەى ئاسایشى هەولێر ناشرینترکردنى روى ئەزموونى حوکمڕانیە لەهەرێمى کوردستاندا


ئەم کارو قسەیەى ئاسایشى هەولێر ناشرینترکردنى روى ئەزموونى حوکمڕانیە لەهەرێمى کوردستاندا، بەدرۆخستنەوەى خودى ئەو بانگەشانەشە کە یەکێتى و پارتى 27 ساڵە بەخەڵکى ئەفرۆشنەوەو خەڵکى پێ تەخدیر ئەکەن، لە هەمان کاتدا دۆستەکانیشمان ئەم وێنەیەیان لا دروست دەبێت، پاش 27 ساڵ هاوکارى وراهێنان ودەستگرتنى کورد، ئینجا ئەم قەومە ئەگەڕێنەوە بۆ قۆناغى پێش نوسینەوەى یاسا واهەڵسوکەوت ئەکەن، لەبەر ئەوە ئەمانە شایانى دەوڵەتدارى نین.

چونکە زۆر بەکورتى: دەوڵەتى هاوچەرخ بە عەقڵیەتى خێڵ و قۆناغى پێش یاسا و چاخە سەرەتاییەکان بەڕێوە نابرێت.

1716 جار خوێندراوەتەوە