راشکاوانە لەسەر دەنگدانەوە بە گۆڕان و لیستی ژمارە ۱٤۸


(چەند راستیەکی حاشا هەڵنەگر)


هێشتا هیچ هێزێکی سیاسیی نیە یا نەیتوانیوە بتوانێ بەدیلی گۆڕان بێت ، گۆڕان هێشتا سەرەڕای کەموکوڕیەکانی وەک پرۆژەی سیاسی باشترینە و بەدیلی دروست نەبوە.

ئەوانەی دەیانەوێت فەشەل بە گۆڕان بهێنن لە باشترین حاڵەتدا ئەگەر سەرکەوتوشبن ناتوانن خۆیان ببە بەدیلی گۆڕان و تەنها ئەو خزمەتە بە یەکێتی و پارتیی دەکەن.

بە مانایەکی دیکە و ئەگەر زۆر واقعی بین دور لە خۆشخەیاڵی رەنگە هێز هەبێت دڵی بەوەخۆش بێت کە دەتوانێ دەنگی گۆران ببات و لاوازی بکات ، بەڵام دەبێ ئەوە رون بێت ئەوهێزانە تاکە شتێک تیا سەرکەوتو بن لاوازکردنی گۆڕانە بەڵام خۆیان ناتوانن جێگەی گۆڕان بگرنەوە بەڵکو ساحەکە بۆ ینک و پدک چۆڵ ئەکەن و بەس .
هەمو دەنگنەدانێک وەک دەنگدان وایە بە یەکێتی و پارتی بە تایبەت پارتی
ئەوە مانای ئەوە نیە با هێزی تر نەبێت ، بەلکو بەومانایەیە بۆچی دەبێت هێزی نوێ لەسەر حسابی پەلاماردان و دژایەتی گۆڕان دروست بێت ؟!بۆچی دەبێت هێزی نوی لەبری یەکێتی و پارتی لاوازکردنی گۆڕان بکاتە ئامانج؟!

گۆڕان دوای نەوشیروان مستەفا کێشەی قیادەکردنیی هەیە بەڵام هێشتا وەک بەرنامە بۆ گۆڕانکاری تۆکمەترین بەرنامەیە و دەستبەرداربونی گۆڕان بەو ئاسانیە جارێکی تر دۆخی سیاسیی هەرێم بۆ ماوەیەکی زۆر دێنێتە دواوە و ئاسان ئەم هیوایە ناگەشێتەوە .

دەنگدان بە گۆڕان دەنگدان نیە بە هیچ شەخصێک لەوانەی ئەمڕۆ ئەیبەن بەڕیوە ، بەڵکو دەنگدانە بە بەرنامەیەکی سیاسیی تۆکمە کە نەوشیروان مستەفا دایڕشتوە .

رەنگە ئەوانەی ئەمڕۆ گۆڕان بەڕیوە دەبەن لە ئاست گەورەیی و فراوانی بەرنامەی گۆڕاندا نەبن، هەڵەیان هەبێت کەبێگومان هەیانە و خۆشمان دەیان جار رەخنەمان لێگرتون، بەڵام هەڵە جیایە لە، خیانەت ، لە تاوان ، جیایە لە خاک فرۆشی ، جیایە لە خۆفرۆشی ، جیایە لە دزینی نەوت و گەندەڵی قیادەی گۆڕان ئەمانەی نەکردوە، جیا لەوەی کەسەکان دەڕۆن و بەرنامەکە دەمێنیتەوە بۆیە دەنگبدە بە بەرنامەی گۆڕان و حساب بۆ هەڵەی شەخصەکان مەکە .

سزادانیی گۆڕان و بەرنامەکەی لەبەر ئەدائی خراپی چەند کەسێک تەنها سزادانی ئەوان نیە ، بەڵکو سزادانی کۆمەڵگەیە و زاڵکردنەوەی تەواوەتی جارێکی تر دو حزبە تەقلیدیەکەی کوردستانە کە مێژو سەلماندویەتی هەرکات ئەوان بەهێز بن هەرێمی کوردستان بەڵای گەورەی بەسەردا هاتوە ، بڕواننە ساڵی حەفتاو چوار و ئاشبەتاڵ ، برواننە نەوەد و چوار و شەری ناوخۆ ، بروانە ۳۱ ئاب و لێکەوتەکانی برواننە ۲٠۱۷ و ریفراندۆم و ۱٦ ی ئۆکتۆبەر و لێکەوتەکانیی .

بۆ بایکۆتیش( کە قسەی ترم دەبێت لەسەری ) دڵنیابن هەمو دەنگنەدانێک وەک دەنگدان وایە بە یەکێتی و پارتی بە تایبەت پارتی ، گرەوی ئەمجارەی تەزویر لەسەردابەزینی رێژەی بەشداری هاوڵاتیانە بۆ ئەوەی ئەم دو حزبە جارێکی تر ببنەوە زۆرینەیەکی گەورە، خۆ ئەگەر بریاریش بێت بە تەواوی ساحەکە بۆ ئەوان چۆڵبکرێ ئەوەیان شتێکی ترە و قەناعەتی خۆت دەیزانێت !
مەهێڵن ئیرادەی چەتەگەری سیاسیی زاڵ بێت و دەنگبدەنەوە بە گۆڕان

خۆ ئەگەر قەرار بێت هەڵوێست دژی ئەم سیستمە وەربگیرێ و ئەوەی پێی دەگوترێت دکتاتۆریەتی هەڵبژاردن بە تەزویر رەتبکرێتەوە ئەوە ئەرکی هەموانە نەک تەنها گۆڕان ، وەگەر نا منیش لەوانەم کە پێم وایە یاخیبون لەم سیستمە لەم جۆری رێسای یاریە سیاسیە چەقبەستوە بۆتە ئەرک بەڵام ئایا ئێستا لە سایەی قیادەی ئێستای حزبەکانی دەرەوەی یەکێتی و پارتیی مومکینە؟ پێم وانیە وەڵامی کەس زۆر ئەرێنی بێت .

دەبێ ململانێی و ترسێک ، هاوارێک دەنگێک لەبەردەم یەکێتی و پارتیدا هەبێت بۆ وەستاندن یا کەمکردنەوەی بەدکاریان ، بەدیدی من هێشتا ئەو دەنگ و هاوارە گۆڕانە .

بۆیە سەرباری هەمو رەخنەیەک هێشتا گۆڕان باشترینە لەناو گۆرەپانە سیاسیەکەدا و هیوادارم لەم هەڵبژادنەشدا متمانەی پێ بکەن و دەنگ بدەن بە لیستی ژمارە ۱٤۸.

گۆڕان ئێستا بە پارەی نەوت ، بە پارەی دزراوی خەڵک ، روبەروی گەورەترین پەلاماردانی سیاسیی و سایکۆلۆژی بۆتەوە و میدیای نەوت و میدیای پارەی دزراو دۆخێکیان خولقاندوە وەک ئەوەی گۆڕان بەرپرسی دۆخیی خراپی خەلک و خاک فرۆشی و ئایندە فرۆشی و لە گۆڕنانی خەونی سەربەخۆیی بوبێت .

مەهێڵن ئیرادەی چەتەگەری سیاسیی زاڵ بێت و دەنگبدەنەوە بە گۆڕان ، بە هەمو خراپیەکانیەوە باشترین هێزی ئامادەی ئەمڕۆیە لە گۆڕەپانەکەدا .

دوا قسەم ئەوەیە گۆڕان وەک حزب جیایە لە ئامانجی گۆڕانکاری ، تۆ دەشێ گۆڕان نەبیت ،یا واز بێنیت لە گۆڕان بەڵام بێگومان تۆ وەک مرۆڤێکی خاوەن مەبدەئوپرەنسیپ ئەکید خەونی گۆڕانکاریت هەر ئەمێنێ و ئەوەش وات لێدەکات بپرسیی ، گریمان دەنگ نادەی بە گۆڕان ، دەنگ ئەدەی بە کێ ؟ یا کە دەنگ نادەی دەچێتە خزمەتی کێوە ؟

بۆ ئەوەی خەونی گۆڕانکاری بژیت ، دەنگ بدەن بە گۆڕان .

له‌ په‌یجی نوسه‌ر له‌ تۆڕی كۆمه‌ڵایه‌تی فه‌یسبوك وه‌رگیراوه‌:

6185 جار خوێندراوەتەوە