لە 10 مانگی ڕابردوودا 517 پیاو لەلایەن خێزانەكانیانەوە توندوتیژییان بەرانبەر كراوە

04:21 - 06/11/2018
هەمەڕەنگ

یەكێتی پیاوانی كوردستان؛ توندوتیژی دژ بە پیاوان لە هەڵكشاندایە

لە ماوەی 10 مانگی رابردووی ئەمساڵدا زیاتر لە 500 پیاو لەلایەن خێزانەكانیانەوە توندوتیژییان بەرامبەر كراوەو چوار پیاویش لەلایەن ژنەكانیانەوە بەهاوكاری كەسانیتر كوژراون، سكرتێری یەكێتی پیاوانی كوردستانیش ئاشكرای دەكات، ئامارەكە بەراورد بە 2016 هەڵكشانی زۆری بەخۆیەوە بینیوەو هۆكارەكەش بۆ قەیرانی دارایی و ناهووشیاری خێزانەكان دەگەڕێنێتەوە.

ئومێد سەعیدی تەمەن 63 ساڵ، لە شەوێكی گەرمی هاویندا لەلایەن ژن و كوڕەكەی بە تەقە لەماڵ دەكرێتە دەرەوە.

ئەم پیاوە، كە ماوەی سێ ساڵە لەماڵێكی كرێدا دەژی، هێشتا ترس و دڵەڕاوكێی خێزانەكەی بۆ ساتێكیش لە دڵی دەرنەچووە‌و هانای بۆ رێكخراوی یەكێتی پیاوان هێناوە تا كێشەكەی بۆ چارەسەر بكەن.

بە تەنها كێشەكەی ئومێد سەعید لەلای رێكخراوی یەكێتی پیاوانی كوردستاندا نییە، بەڵكو لەماوەی 10 مانگی ڕابردوودا 517 جۆر لە سكاڵاو توندوتیژی دژی بە پیاوانیان لە هەرێمی كوردستان تۆمار كردووە، لەگەڵ ئەوەشدا كوشتنی چوار پیاو لەلایەن ژنەكانیان و خۆكوشتنی 45 پیاویتریان تۆمار كردووە.

ڕاوێژكارێكی خێزان لە ڕێكخراوی یەكیتی پیاوان باس لەوە دەكات: ڕێكخراوەكەیان دژی ژنان نییە، بەڵكو هەر لایەكیان هانایان بۆ بەرن، ڕێنمونییان دەكەن و كێشەكانیان چارەسەر دەكەن، دەشڵێت: لەماوەی 11 ساڵی كاركردنیاندا زیاتر لە سێ هەزار كێشەیان چارەسەر كردووە.

لەگەڵ ئەوەی یاسای توندوتیژی خێزانی و بەڕێوەبەرایەتی بەرەنگاربوونەوەی توندوتیژی خێزانی لە هەرێمی كوردستاندا بونیان هەیە، بەڵام نەیانتوانیوە ببنە بەشێك لە چارەسەری كێشەكانی پیاوان، ئەمە وتەی سكرتێری ڕێكخراوی یەكێتی پیاوانی كوردستانەو لە ئێستاشدا ژمارەیەك پرۆژەیان بۆ پەرلەمانی كوردستان ئامادە كردووە تا بكرێنە پرۆژە یاساو لە بەرژەوەندی پیاوان پەسەند بكرێن.

1192 جار خوێندراوەتەوە